Wasiirka caafimaadka xukuumada Soomaaliya Maxamed Xaaji C/nuur ( Madeer) oo dhawaan ra’iisul wasaaraha Soomaaliya u magacaabay xilka wasiirka caafimaadka ayaa maanta kulan la yeeshay howl wadeenada wasaaradda iyo xubno ka socday hey’adaha wasaaradda caawiya.
Agaasimaha guud ee wasaarada caafimaadka Dr. Cabdullaahi Xaashi ayaa sheegay in loo baahan yahay in wasaaradda caafimaadka ay koobto dhamaan dalka oo la soo celiyo awoodi ay ku gaari laahayd adeegyada caafimaadka ee shacabka Soomaaliyeed ay ugu baahan yihiin.
Wasiirka caafimaadka ee xukuumada Soomaaliya Maxamed Xaaji C/nuur (Madeer) ayaa sheegay in isbedel lagu soo kordhin doono qaabka ay wasaaradda u shaqeyso si loo helo gaarsiinta adeega caafimaadka ee wasaaradda loo egmaday.
“Waxaan is bedel ku samayn doonaa awooda wax soo saaraka wasaaradda caafimaadka ee hataan,waxaan sare u qaadayaa adeega caafimaadka bulshada oo aan gaarsiin doono meesha ugu wanaagsan ,waxaan jecalahay in aan ka dhabeeyo balan qaadkeeda”. Ayuu yiri wasiirka.
Wasiirka cusub ee wasaarada caafimaadka Maxamed Xaaji C/nuur (Madeer) ayaa xilka wasiirka caafimaadka loo dhaariyay maalintii shalay, waxaana uu xilkaas kala wareegay wasiirkii hore ee wasaaradda caafimaadka Xaawo Xasan Maxamed.
