Wasiirka Wasaaradda Caafimaadka iyo daryeelka bulshada Xukuumadda Federaalka Soomaaliya Dr. Cali Xaaji Aadam ayaa maanta Shir guddoomiyay kulan wada tashi iyo u gurmasho ah oo la xiriira Dhibaatada gubashada ee isbitaalka Demartino soo gaartay 11/03/2023.
Waxaa Shirka ka soo qaybgalay xubno ka socday ganacsatada Soomaaliyeed, Hay’ada culimada Soomaaliyeed , bulshada rayidka iyo Agaasimayaasha Isbitaalada Dowladda ee danta guud ka shaqeeya.
Agaasimaha guud ee Isbitaalka Demartino Dr Cabidirsaaq Yuusuf Axmed Jalaaludiin ayaa si faah faahsan uga warbixiyay wax qabadka Isbitaalka, duruufta adag ee uu Isbitaalka ugu shaqeeyo bulshada Soomaliyeed iyo warbixin ku saabsan gubashada iyo dabka dhibka uu u geestay Isbitaalka Demartino.
Wasiirka Wasaarada Caafimaadka ayaa u xil saaray guddi isugu jira dhamaan qaybihii kulanka ka soo qaybgalay, gudigan ayaa ka shaqeyn doona in si dag dag ah gurmad loogu sameeyo Isbitaalka qeybta gubatey.
