Wasiirka Wasaaradda Caafimaadka iyo daryeelka Bulshada Xukuumadda Federaalka Soomaaliya Dr Cali Xaaji Aadan ayaa maanta Xafiiska ku qaabilay wafdi ka socday Ururka Iskaashiga Islaamka iyo Safaaradda Sucuudiga.
Kulanka waxaa goobjoog ka ahaa Wasiiru dowlaha Wasaaradda Caafimaadka Dr Maryama Maxamed Xuseen iyo Isaak Mohamud Mursal Wasiir ku-xigeenka arrimaha dibadda halka wafdigana ay horkacayeen Ambassador Mohamed Bamba, Agaasimaha Guud ee Ergada Gobolka u qaabilsan Ururka Iskaashiga Islaamka, Ambassador Abdul Aziz Al-faraih, Safiir ku xigeenka Sucuudiga ee Soomaaliya iyo Injineer Cabdullaahi Cali Geelle, Ku-xigeenka Agaasimaha Guud ee Ergada Gobolka ee Ururka Iskaashiga Islaamka.
Wafdiga ayaa warbixino ku saabsan howlaha Caafimaad ee ay ka fuliyaan Soomaaliya la wadaagay Wasiirka Wasaaradda Caafimaadka iyo Daryeelka Bulshada Xukuumadda Federaalka Soomaaliya Dr CaliXaajiAadan, iyagoo sheegay in qeybta Caafimaadka Soomaaliya waxbadan ay ka caawin doonaan Wasaaradda.
Ururka Iskaashiga Islaamka OIC ayaa Soomaaliya ka fuliya Mashaariic waxayna hadda dayactir iyo qalabayn ku wadaan saddex xarumo Caafimaad ah oo ku kala yaala Caabudwaaq, Beergadiid iyo Isbitaalka guud ee degmada Afgooye oo dhawaan la dhameeyey dhismihiisa kaas oo la filayo in dhawaan la daahfuro, Ururka Iskaashiga Islaamka ayaa ku guulaystey dhameystirka Isbitaalka guud ee Afgooye waxaana sida ugu dhow loo billaabi doonaa in xaruntaasi lagu fuliyo howlihii loogu talagalay ee loo dhisay.
Wasiirka Wasaaradda Caafimaadka iyo daryeelka Bulshada Xukuumadda Federaalka Soomaaliya Dr Cali Xaaji Aadan ayaa bogaadiyey OIC, waxa uuna amaanay in Ururka Iskaashiga Islaamka ay diyaar u yihiin ka qeyb qaadashada horumarinta Caafimaadka Soomaaliya.
