Wasiirka Wasaradda Caafimaadka iyo daryeelka Bulshada Xukuumadda Federaalka Soomaaliya Dr. Cali Xaaji Aadam ayaa xafiiska ku qaabilay Wafdi ka socday Hey’adda UNFPA.
Kulanka waxaa goobjoog ka ahaa Wasiiru-dowlaha Wasaaradda Caafimaadka Drs. Maryam Maxamed Xuseen, qaar ka mid ah agaasime waaxeedyada Wasaaradda Caafimaadka iyo xubno kale oo ka tirsan Wasaaradda.
Wafdiga ka socday UNFPA ayaa warbixin ku saabsan howlahooda ku aadan arrimaha Caafimaadka siiyay Wasiirka Wasaaradda Caafimaadka iyo daryeelka Bulshada Xukuumadda Federaalka Soomaaliya iyo qorshahooda ku aadan Mashaariicda Caafimaad ee ay kaga qeyb qaadanayaan horumarinta Caafimaadka Soomaaliya.
Kulanka oo ahaa isbarasho iyo isxog-waraysi ayaa looga hadlay wada shaqeynta ballaaran ee ka dhaxeysa Wasaaradda Caafimaadka Soomaaliya iyo Hey’adda UNFPA iyo sidii loo xoojin lahaa wada shaqeynta labada dhinac si loo xaqiijiyo wax ka qabashada qeybta Caafimaadka Qoyska.
Wasaaradda Caafimaadka iyo daryeelka Bulshada Xukuumadda Federaalka Soomaaliya waxaa ka go’an xoojinta xiriirka kala dhaxeeya Hey’adaha Caalamiga ah, si loo gaaro hadafka fog ee Wasaradda Caafimadka ee ku salaysan horumarinta iyo tayeynta Caafimaadka dalkeena iyadoo la raacayo yoolka Dowladda ee dhanka horumarinta adeegyada Caafimaadka.
