Kulanka oo ka dhacay xafiiska wasiirka cadaaladda XFS ayaa waxaa ka qayb galay guddoomiyaha maxkamada sare ee dalka, xeer ilaaliyaha guud ee Qaranka iyo taliyaha xabsiga dhexe ee Xamar, wasiirka ayaana kulankaan ku casuumay culimada Soomaaliyeed oo uu kala hadlay arrimo la xiriira horumarinta cadaalada iyo sidii ay qayb uga noqon lahaayeen.
Kulanku waxaa uu daba socday kulamo horay wasiirka cadaaladu ula qaatay culimada iyo booqasho culimada iyo wasiirka oo wada socdaa ay ku tageen xabsiyada qaar sida xabsiga dhexe, waxaa maanta aad looga hadlay sida loogu baahan yahay in maxaabiista ay helaan cadaalad isla markaana xal loo helo maxaabiista xabsiga dhexe ugu xiran dambiyo yar yar oo iyagana dhib ku ah.
Dood dheer iyo wada hadal ka dib markii kulanku soo idlaaday ayaa warbaahinta qaranka waxaa ay weydiisay, Sheekh Cali wajiis xoghayaha guud ee majmaca culimada Soomaaliyeed qodobadii laga hadlay iyo go’aanadii soo baxay.
“Waxaa uu ahaa kulan muhiim ah waxaan ka wada hadalnay wasiirka iyo mas’uuliyiinta kale in dib u eegis lagu sameeyoย maxaabiista xabsiyada ku jirtay in cadaalad ay helaan sidii diinta islaamku qabtay in ay jiraan maxaabiista qaar oo waqtigooda dhameystay hadana iska sii xiran hadii wax ka jiraan arimahaas ayaan isla soo qaadnay,” ayuu yiri Sheekh Cali.
Wasiirka Cadaaladda XFS Mudane Xasan Xuseen Xaaji ayaa dhankiisu is dultaagay muhiimada shirka iyo waxyaabihii laga dooday iyo sidoo kale, dadaalka wasaaradu ugu jirto xoojinta hay’adaha cadaaladda dalka.
“Waxaa sharaf u ah wasaaradda inay kulan muhiim ah oo looga hadlayay sare u qaadistay iyo tayeynta hay’adaha cadaaladda la qaadatay culimada Soomaaliyeed runtii wuxuu ahaa kulan muhiim ah oo aan kaga hadalnay in maxaabiistu helaan garsoor hufan isla markaana xabsiga cusub ee hadda la dhameestiray uu shaqeeyo wax badan oo aan ka hadalnay waan isla garanay horay ayaan sidaan oo kale kulamo uga yeelanay arimahaan cadaalada la xiriira,” ayuu yiri wasiirka.
