Wasiirka Wasaaradda Cadaaladda iyo Arrimaha Garaoorka Dowlad Goboleedka Koonfur Galbeed Soomaaliya, mudane Xasan Ibraahim Xasan, oo ay wehlinayaan Wasiir ku-xigeenka iyo Agaasimaha guud ayaa maanta booqosho ku tageen xarunta Maxkamadda Sare, waxaana hakaas ku soo dhaweeyay, Guddoomiyaha Maxkamada Sare Dowlad Goboleedka Koonfur Galbeed Dr Axmed Cali Muuse.
Wasiir Xasan ayaa kormeeray qeybaha ay ka koobantahay maxkamadda, halkaasi oo uu kulamo kula yeeshay laamaha garsoorka, isagoo kula dar daarmay inay bulshada ugu adeegaan si cadaalad ah.
“Waxaa sharaf weyn ii ah inaan maanta booqasho ku tego xafiiska Guddoomiyaha Maxkamadda Sare , ka dibna aan shir miro-dhal ah la yeesho guddoomiyaha maxakamdda sare , Xeer ilaaliyaha guud ee Koonfur Galbeed iyo dhaman Guddoomiyeyaasha Maxkamadda Rafcaanka gobalka iyo degmada, Garsooriyaasha, Xeer ilaaliyaasha, kaaliyaasha iyo gaarsiiyeyaasha”. Ayuu yir Mudane Xasan.
Wasiirka Wasaaradda Cadaaladda Koonfur Galbeed ayaa booqday xabsiga dhexe Baydhaba, waxaa halkaas ku soo dhaweeyay Taliyaha Asluubta dowlad Gobaleedka Koonfur Galbeed Soomaaliya oo uu ka dhageystay war bixin guud oo ku saabsan xaalada maxaabiista ku xiran xabsiga dhexa ee Baydhaba.
