Wasiirka Caddaaladda XFS, Mudane, Xasan Xuseen Xaaji, ayaa Maanta oo Sabti ah furay tababar ku saabsan habraaca howl-galinta nidaamka habka dadban ee xallinta Khilaafaadka, kaas oo dhawaan ay hirgalisay Wasaaradda Caddaadda.
Tababarkaan oo Labo Maalin socon doona ayaa waxaa ka qayb galay, Odayaasha dhaqanka Haweenka iyo Culimaa’udiin, kuwaas oo ah wakiillada ay Wasaaraddu u xil-saartay hir-gelinta nidaamkan oo hadda ka shaqeeya dhowr Degmo oo ka mid ah Gobolka Banaadir.
Wasiirka Caddaaladda iyo Garsoorka ayaa ka qaybgalayaasha kula dardaarmay in ay ka faa,iideystaan Tababarka Wasaaradduna ay dedaal ku bixin doonto in Bulshada loo daadejiyo Garsoorka, sidii uu dhaqanka Soomaaliyeed ahaana kiisas badan oo Bulshada ka dhex dhaca lagu xallin doono nidaamka xeer beegtida.
“Maanta tababarku muhiimadda uu leeyahay waa kow inaan sii wadno tababarka Bilihii la soo dhaafay waxbaan ka baranay waxaas aan ka baranay inaan sii kordhino qubaradu tababarro dheeraad ah idin siiyaan iyo mida kale oo ah wasaaradu waxaa ay diyaarisay habraacii lagu shaqey lahaa habraacaas laftiisa in la idinku tababaro adinkuna ka faa,iideysataan ayay tahay ujeedada siminaarkaan” ayuu yiri Wasiirka.
Dhowr Bil ka hor ayay ahayd markii Wasaaradda Cadaaladda ay Degmooyin dhowr ah oo ku yaalla Magaalada Muqdisho ka hirgalisay Xafiisyo wasaaradda uga wakiil ah xallinta Khilaafaadka Bulshada ka dhex dhaca ee Xeer beegtida loo yaqaan.
Waxanay wasaaraddu tallaabadani ku micneysay in kiisas badan oo Maxkamadaha lala aado looga maarmo nidaamkan xeer beegtida, wuxuuna wasiirku sheegay in horumar laga sameeyay ujeedkii loo hirgaliyay Barnaamijkan.
