Wasiirka wasaaradda Dhallinyarada iyo Ciyaaraha Xukuumadda Federaalka Soomaaliya Mudane Xildhibaan Maxamed Barre Maxamuud ayaa gaaray Caasimadda Serbia ee Belgrade ,kadib casuumaad uu ka helay dhiggiisa Serbia Dr. Zoran Gajić.
Wasiirka iyo wafdigiisa waxaa garoonka diyaaradaha Caasimadda Belgrade, ku soo dhoweeyay Danjiraha Safaaradda Jamhuuriyadda Federaalka ah ee Soomaaliya u fadhiga Belgrade Amb. Maxamed Cabdullaahi Axmed.
Sida uu qorshuhu yahay Wasiirka ayaa la kulmi doona dhiggiisa Wasiirka Cayaaraha isagoo sidoo kale ka qayb-gelli doona xafladda xiritaanka horyaalka Caalamiga ah ee IMMAF World Championships.
Wasiir Maxamed Barre ayaa inta uu joogo Belgrade lagu wadaa inuu kulamo la yeesho masuuliyiin kale oo dowladda Serbia ka tirsan, kuwaas oo uu kala hadli doono tababarka xirfadaha gacanta oo dalkaasi uu aad ugu horeeyo, si looga faa’iideeyo dhallinyarada Soomaaliyeed ee aan fursadda u hellin waxbarashada Nidaamiga ah.
Wafdigaasi oo uu kamid ahaa la-taliyaha wasiirka Eng. Fahad Cali Xasan,waxaa lagu wadaa in booqasho shaqo oo laba cisho ah ku joogaan dalkaasi.
Soomaaliya iyo Serbia oo lahaan jiray xiriir facweyn ayaa dib boorka uga jafay xiriirkoodii, iyadoo dowladda Soomaaliya ay dalkaasi ku leedahay safaarad kaalin muuqata ku leh xoojinta xiriirka labada dal.
