Wasiirka Ganacsiga iyo Warshadaha Xukuumadda Federaalka Soomaaliya Mudane Jibriil Cabdirashiid Xaaji, ayaa xalay ka qeybgalay xaflad casho sharaf ah oo lagu sagootinaayey Ganacsatadii Talyaanida ahayd ee dalka u yimi ka qeybgalka Shirka Dhaqaalaha Soomaaliya oo Muqdisho ka qabsoomay 30ka illaa 31kii May, 2023.
Wasiirka, ayaa uga mahadceliyey imaatinkooda Soomaaliya oo muujinaaya rabitaankooda dhinacyada Iskaashiga Ganacsiga iyo Maalgashiga, waxaana uu carabka ku dhuftay in Soomaaliya ay ka jiraan fursado badan oo maalgashi isla-mar-ahaantaana uu rajeynaayo in iyaga iyo ganacsatada Soomaalidu ba ay dalka ka samayn doonaan maalgashiyo waaweyn iyo ganacsiyo horumar u horseeda wadanka.
Shirka Dhaqaalaha Soomaaliya, ayaa maalinkiisii koowaad loogga hadlay Shirka 2aad ee Madasha Ganacsiga Soomaaliya iyo Talyaaniga, halkaas oo ay ku kulmeen ganacsato tiro badan oo Talyaani ah iyo kuwo Soomaali ah.
