Wasiirka Ganacsiga iyo Warshadaha Xukuumadda Federaalka Soomaaliya Mudane Jibril Cabdirashiid Xaaji Cabdi, ayaa maanta hor-tegay guddiga Dhaqaalaha, Ganacsiga, Warshadaha iyo Maalgashiga ee Golaha Shacabka Baarlamaanka Federaalka Soomaaliya, waxaana uu warbixin ka siiyey hawlaha shaqo ee Wasaaradda, qorsheyaasha iyo shuruucda horyaala ee mudnaanta u leh.
Wasiir Jibril iyo mas’uuliyiinta kale ee Wasaaradda, ayaa si hufan uga jawaabay su’aalihii la waydiiyey, waxaana ay iftiimiyeen dedaalada socda ee lagu horumarinayo laguna fududeynaayo ganacsiga dalka iyaga oo carabka ku dhuftay inay dhawaan Baarlamaanka u soo gudbin doonaan shuruuc iyo heshiisyo kala duwan oo ahmiyad weyn u leh horumarka Ganacsiga iyo Warshadaha ee dalka.
Shuruucda iyo siyaasadaha ay Wasaaraddu gacanta ku hayso, ayaa waxa ka mid ah Sharciga Horumarinta Warshadaha, Sharciga Sinaanta Tartanka, Sharciga Laysamada, Sharciga Shirkadaha Gaadleyda, yar yar iyo Kuwa dhexe (Startup Act), Siyaasadda iyo Sharciga Wax Wada-lahaanshaha Dowlada iyo Ganacsiga Gaarka ah (PPP) iyo Sharciga Summadaha Ganacsiga oo dhammaantood ba maraaya meel aad u wanaagsan.
