Wasiirka Haweenka iyo Horumarinta Xuquuqda Aadanaha ee Xukuumadda Federaalka Soomaaliya Marwo Xaniifa Maxamed Ibraahim oo hogaaminaysa Xildhibaanno ka mid ah Baarlamaanka Soomaaliya, guddoomiye ku xigeenka arrimaha bulshada gobolka Banaadir, Ururrada Haweenka Qaranka, kan gobolka, Ururrada bulshada rayidka ayaa caawa kulan la yeeshay Madaxweynaha Dowlad Goboleedka Koonfur Galbeed Mudane Cabdicasiis Xasan Maxamed Laftagareen.
Kulanka ayaa looga hadlay xaqiijinta qoonddada haweenka 30% ee doorashada soo socota, waxaana Madaxweynaha Koonfur Galbeed uu xusay in marwaliba diyaar u yahay sidii u ilaalin lahaa Qoondada Haweenka Soomaaliyeed.
Waxaa uu qeyb yahay kulanka caawa, ololaha Wasaaradda Haweenka ugu jirto sidii loo ilaalin lahaa qoonddada, Wasiirka waxay la kulantay Madaxweyniyaasha Dowlad Goboleedyada Galmudug, Hirshabeelle, Jubaland waxayna ku adkeysay dhammaan mas’uuliyiintan in ay haweenka ugu garab istaagaan sidii u heli lahaayeen xuquuqdooda siyaasadeed.
