Wasaaradda haweenka Soomaaliya oo hormuud u ah qeybaha haweenka Soomaaliyeed ayaa dhawaanahaanba waday dadaalo ay ku doonayaan in ay ku helaan qoondada ay ku leeyihiin dowladda, waxaana jiray kulan shalay ra’iisul wasaare Cumar C/rashiid uu la qaatay qaar kamid ah haweenka Soomaaliyeed oo arintooda u bandhigay ra’iisul wasaaraha, si loo cadeeyo qoondada ay leeyihiin.
Wasiirka Haweenka Xukuumada Soomaaliya Marwo Sahra Maxamed Cali Samatar ayaa sheegtay in muhiim ay tahay Haweenka in ay helaan Qoondada ay ku leeyihiin Dowladda soo socota, si ay u soo bandhigaan waxqabadkooda.
Waxa ay sheegtay Go’aanka ugu dambeeya ee ku aadan Qoondada Haweenka in lagu go’aamin doono shirka Madasha Wadatashiga Qaran ee Bisha September ka furmi doona magaalada Muqdisho.
Madaxweynaha Soomaaliya Xasan Sheekh Maxamuud ayaa horey u sheegay in Haweenka Soomaaliyeed ay heli doonaan Qoondada ay ku leeyhiin Dowladda cusub, hadii mida ay dhici weydana ay heli doonaan meel u dhow Qoondadooda ah boqolkiiba soddon.
