Wasaaradda Maaliyadda ayaa sheegtay iney qiimo dhimis ku sameysay Miisaaniyadda dowladda ee sanadka 2015-ka, xilli baarlamanka uu shalay ansixiyay Miisaaniyaddaasi dib u eegis kaddib.
Wasiirka wasaaraddaasi Maxamed Aden “Fargeto” oo la hadlay Radio Muqdisho ayaa tilmaamay in wasaaraddiisu ay dadaal badan ku bixisay dhimista miisaaniyadda dowladda ee sanadkan, wuxuuna soo dhaweeyay ansixintii baarlamanka ee miisaaniyadda sanadkan.
“Miisaaniyadda qaar waa jarid qaarna waa dib u habeyn, waxaa dhici jirtay in ciidamada qaar ay laba lacagood qaataan qaarna ay hal lacag qaataan, marka lacagaha qaar waxaa bixinayay wadamada anaga saaxiibka nala ah, waxaan ku heshiinay marka intii ciidan mid boqol doolar qaadan laha midna laba boqol iyagoo iska garab dagaalamaya in hal lacag laga wada dhigo” ayuu yiri wasiirka Maaliyadda.
Wasiirka oo hadalkiisa sii wata ayaa hoosta ka xariiqay in canshuuro laga qaadayo lacagaha gunnooyinka ah ee laga qaado wasaaradda, mana jirto ayuu yiri sharci diidaya canshuurtaasi.
Sidoo kale wasiirka ayaa xusay in qiimo dhimis lagu sameeyay adeegyada xafiisyada dowladda, isagoo intaa raaciyay in qiimo dhimistaasi aysan saameeyn ku yeelan doonin adeegyada bulshada.
