Wasiirka Maaliyadda Soomaaliya Mudane Dr. Cilmi Maxamuud Nuur oo ku sugan magaalada Sharma Sheekh ee dalka Masar ayaa kulamo gaar gaar ah la qaatay Madaxweynaha Bangiga Horumarinta Afrika, Qaar ka mid ah Wasiirada Maaliyadda ee Dalalka Geeska Afrika.
Wasiirka Maaliyadda Soomaaliya oo dadaal dheeri ah ugu jira horumarinta hannaanka Maaliyadda Soomaaliya ayaa sheegay in uu kala hadlay madaxdii uu la kulmay arrimaha muhiimadda u leh nidaamka casriga ah ee Maaliyadda Soomaaliya iyo Barnaamijka Deyn-Cafinta Soomaaliya.
Waasiirka Maaliyadda Soomaaliya Mudane Dr. Cilmi Nuur ayaa sheegay kulankii ay yeesheen Wasiirada Maaliyadda ay kaga wada hadleen arrimaha horumarinta dhaqaalaha dalalka Bariga Afrika iyo sidii looga gudbi lahaa caqabadaha ku hor gudban dhaqaalaha Afrika iyo kan Soomaaliya, Sidoo kale shirka ayaa looga dooday sidii dal waliba uu maalgalin u gaar ah uga heli lahaa Bangiga Horumarinta Afrika.
Dhawaan waxaa si rasmi ah uga furmi doona Magaalada Sharma Sheekh ee Dalka Masar Shirka sanad laha ah ee Bangiga Horumarinta Afrika.
