Xafladan lagu xusayay 5-sano guuradii ka soo wareegatay maanta oo kale markii la aas aasay Idaacadda Kulmiye oo kamid ah idaacadaha madaxabanaan ee ku yaala Magaalada Muqdisho ayaa waxaa ka qeybgalay Wasiirka Warfaafinta,dhaqanka iyo dalxiiska,Xildhibaan Cabdi Shire Jaamac oo katirsan Baarlamanka Federaalka ah,Gudoomiyaha Gobolka Banaadir ahna Duqa Muqdisho,Agaasimaha Tv-ga Qaranka,Agaasimaha Wakaaladda Wararka Somaaliyeed ee Sonna,Madaxda Ururka Haweenka Qaranka Wariyaal iyo Marti sharaf kale.
Agaasimaha Idaacadda Kulmiye Abwaan Cismaan Cabdullahi Guure oo ugu horeyn Xafladda ka hadlay ayaa ka sheekeeyay ujeedka loo aas aasay Idaacadda Kulmiye oo uu sheegay in uu ahaa ka shaqeynta iyo gudbinta wararka Xaqiiqada ku saleysan.
Agaasimaha Wakaaladda Wararka Somaaliyeed ee Sonna Mudane Cabdiraxmaan Yuusuf Sheekh Al-Cadaala ayaa hambalyada uu u diray Shaqaalaha Radio Kulmiye kaddib ku dhiirigaliyay Wariyaasha Somaaliyeed inay ka shaqeeyaan horumarka dalka iyo midnimadda Umadda.
Gudoomiyaha Gobolka Banaadir ahna Duqa Magaalada Muqdisho Mudane Yuusuf Xuseen Jimcaale ayaa mar uu ka hadlayay Xafladda 5-sana Guurada Radio kulmiye waxa uu sheegay in Idaacaddaasi ay ka shaqeyso wadinayadda uuna ku amaanayo arintaasi.
Xildhibaan Cabdi Shire Jaamac oo katirsan Baarlamanka Federaalka Soomaaliya ayaa u hambalyeeyay shaqaalaha iyo Maamaulka Idaacadda kulmiye isagoona bogaadiyay shaqada idaacadaasi.
Wasiirka Warfaafinta,dhaqanka iyo dalxiiska Xukuumada Soomaaliya Mudane Maxamed Cabdi Xayir Maareeye ayaa dhankiisa sheegay in Idaacadda kulmiye uu ku amaanayo Wacyigalinta ay u sameyso Bulshada Somaaliyeed.
Gabagabadii Xafladda ayaa shahaado Sharaf ay bixineysay Radio kulmiye halkaasi lagu guddoonsiiyay,Xldhibaan Cbadi Shire Jmaac,Gudoomiyaha Gobolka Banaadir ahna Duqa Muqdisho, Qoraaga Cabduqaadir Nuur Xuseen Maax Wariye Cabdicasiis Africa,iyo Wariye Cabdifitaax Jeyte oo katirsan Warbahainta Qaranka iyo Wariyaal katirsan Radio kulmiye kuwaas oo dhamaan shahaadooyinka lagu siiyay waxqabadkooda.
