Wasiirka Warfaafinta Xukumadda Federaalka Soomaaliya Mudane Cismaan Abuukar Dubbe oo maanta kormeer ku tagay Hotelka Afrik ayaa ka tacsiyadeeyay geerida ku timid Allaha u naxariistee Jenaraal Maxamed Nuur Galaal iyo shacabkii kale ee ay argagaxisadu ku xasuuqday weerarkii shalay ay ku qaadeen halkaasi.
Wasiirka ayaa kormeeray qeybaha uu ka koobanyahay Hotelka, waxaana uu dadkii ku dhintay weerarkii xalay Alle uga baryay in uu janadii fordowso ka waraabiyo.
Mudane Cismaan Abuukar Dubbe ayaa xusay in Jenaraal Maxamed Nuur Galaal uu qeyb weyn ka soo qaatay dhismaha ciidamada xoogga dalka Soomaaliyeed, isla markaana ka mid ahaa Aabeyaasha ciidamada qalabka sida.
“Hotelka waxa uu ahaa hotel ay ku kulmaan dad waxgal ah iyo shacabka oo ay ku casariyeeyaan, waxaa ka dhacay weerar qaawan oo bahalnimo ah, waxaa lagu dilay shan qof oo shacab ah oo ay ku jiraan dad waayeelo ah, oo ay ku jiraan dad aroos ah, oo ay ku jiraan dhallinyaro, shantaas qof Alle ha u naxariisto, dhaawaco oo iyagu sagaal ahna Alle ha u boogo dhayo” ayuu yiri Wasiirka Warfaafinta.
Wasiirka Warfaafinta, dhaqanka iyo Dalxiiska ee Xukuumadda Federaalka Soomaaliya mudane Cismaan Abuukar Dubbe ayaa Maamulka Hotelka uga tacsiyadeeyay qasaaraha ka soo gaartay weerarkii argagixisada. isagoo shacbka ka codsaday inay xoojiyaan la shaqeynta ciidamada.
