Wasiirka Warfaafinta, Dhaqanka iyo Dalxiiska ee Xukuumadda Federaalka Soomaaliya Mudane Cismaan Abuukar Dubbe, Agaasimaha Guud ee Wasaaradda Warfaafinta Mudane Cabdinaasir Xuseen Xasan, Agaasimaha Radio Muqdisho Mudane Cabdicasiis Maxamuud Guuleed Afrika, Agaasimaha Telefishinka Qaranka Mudane Sharma’arke Maxamed Warsame, Maareeyaha Golaha Murtida iyo wacyigelinta iyo ku-xigeenkiisa, qaar ka mid ah agaasime waaxeedyada Wasaaradda Warfaafinta, shaqaalaha Warbaahinta Qaranka iyo marti Sharaf kale ayaa ka qeyb galay munaasabad lagu xusayay waxqabadka 90-kii maalmood ee uu xilka hayo Agaasimaha Radio Muqdisho Mudane Cabdicasiis Maxamuud Guuleed (Afrika) iyo abaal marino la guddoonsiinayay qaar ka mid ah shaqaalaha Radio Muqdisho oo door muhiim ah ka qaatay sare u qaadidda tayada idaacadda.
Maxamed Kaafi Sheekh Abuukar ayaa madasha ku soo bandhigay waxyaabaha u qabsoomay Agaasimaha Radio Muqdisho, muddada 90-ka cisho ah iyo yoolka uu hiigsanayo oo ah in idaacadda la gaarsiiyo guud ahaan gobollada dalka, si fariinta dowladda ay u wada gaarto bulsahda Soomaalyeed iyo qorshe howleedka muddada lixda bil ee soo socota u degsan Agaasimaha.
Qaar ka mid ah howlwadeennada Raadiyaha ayaa goobta ka sheegay in Agaasimaha Raadiyaha uu la yimid waxqabad dhab ah oo ku saleysan tayeyn iyo sare u qaadidda idaacadda, waxaana lagu guuleystay in bogga twitter-ka ee Radio Muqdisho uu helay calaamadda saxda ah iyo dib u habeyn balaaran oo lagu sameynayo Website-ka Radio Muqdisho oo si casri ah loo naqshadeynayo.
Agaasimaha Guud ee Wasaaradda Warfaafinta, Dhaqanka iyo Dalxiiska Mudane Cabdinaasir Xuseen Xasan ayaa xusay in waxqabadka Agaasimaha Radio Muqdisho ay tahay mid cad oo muuqata, ayna gacan ku siinayaan sidii gobollada dalka looga hirgelin lahaa FM radio oo laga dhageysto barnaamijyada iyo wararka ka baxa Radio Muqdisho, ayna ku bogaadinayaan inuu sii labo jibaaro qorshaha uu hiigsanayo.
Wasiirka Warfaafinta, Dhaqanka iyo Dalxiiska ee Xukuumadda Federaalka Soomaaliya Mudane Cismaan Abuukar Dubbe oo ugu dambeyn soo xiray xafladda ayaa bogaadiyay dadaalka wax ku oolk ah iyo isbadalka uu la yimid Agaasimaha Radio Muqdisho Mudane Cabdicasiis Maxamuud Guuleed (Afrika), waxaana uu balan qaaday in la jooteyn doono hannaanka sare loogu qaadayo Warbaahinta Qaranka oo isbadal dhab ah uu ka muuqdo.
Qaar ka mid ah shaqaalaha Radio Muqdisho ayaa madasha lagu guddoonsiiyay shahaado Sharaf, kuwaasi oo ku muteystay waxqabadkii ay muujiyeen, waxaana laga soo kala xulay qeybha kala duwan ee Raadiyaha.
