Wasiirka Wasaaradda Warfaafinta, Dhaqanka iyo Dalxiiska ee Xukuumadda Federaalka Soomaaliya Mudane Maxamed Cabdi Xayir Maareeye ayaa si rasmi ah caawa u furay tartan cilmiyeedka bisha Ramadaan oo sanad waliba ay Warbaahinta Qaranka u qabato degmooyinka gobollada dalka, iyadoo sanadkii saddexaad barnaamijka ay taaba galineyso maamulka gobolka Banaadir.
Munaasabad kooban oo lagu furayey Tartan Cilmiyeedka Ramadaan ee sanadkan oo lagu qabtay Istuudiyaha Radio Muqdisho ayaa waxaa ka qeyb galay Agaasimaha Radio Muqdisho, Agaasimaha Telefishinka Qaranka, Guddoomiyaha Maamulka gobolka Banaadir ahna duqa Muqdisho, Wasiirka Warfaafinta Dhaqanka iyo Dalxiiska iyo xubnaha guddiga tartan cilmiyeedka Bisha barakeysan ee Ramadaan.
Agaasimaha Radio Muqdisho Axmed Faarax Gaatamow ayaa sheegay inay sharaf u tahay in markale ay qabanayaan tartan cilmiyeedka, iyadoo ay dhageystayaasha iyo daawadayaasha ay ka kala socon doonaan Warbaahinta Qaranka, sida Telefishinka iyo Radio Muqdisho.
Agaasimaha Telefishinka Qaranka Cabdinaasir Xasan ayaa sheegay in barnaamijkan uu yahay mid la qabo sanadkii lixaad, waxaana uu intaa ku daray in sanadkan si toos ah looga daawan doono telefishinka Qaranka, halka markii hore Radio Muqdisho kaliya si toos ah loogala socon jiray, taasi oo uu ku tilmaamay inay tahay horumar lagu talaabsaday.
Guddoomiyaha Gobolka Benaadir ahna duqa Muqdisho Mudane Xuseen Yuusuf Jimcaale ayaa ugu horeyn Wasiirka iyo agaasimeyaasha uga mahadceliyay qaqsoomidda barnaamijka tartan aqooneedka, waxaana uu si gaar ah labada degmada ee ku tartamaya u rajeeyay inay guuleystaan sanadkan kiisa xigana ay ku gaaran horumar.
Guddoomiyaha ayaa hambalyo u diray dhamaan ka qeyb galayaasha tartan aqooneedka bisha Ramadaan ee ay sanad waliba qabato Warbaahinta Qaranka, waxaana uu wax lagu farxo ku tilmaamay in aqoon lagu tartamo, isla markaana ay maskaxda maalaan.
“Maskaxda hala maalo, oo halaga faa’iideysto aqoonta lagu tartamayo, kan maamul ahaan waan dhiiri gelinaa, sanadkan waxaan diyaar u nahay in aan markale ka qeyb qaadano, intii ka qeyb gashay oo nasiibka u heshay waan u hambalyayneynaa, aqoonta ha lagu dadaalo”ayuu yiri Guddoomiyaha Gobolka Benaadir ahna duqa Muqdisho.
Wasiirka Wasaaradda Warfaafinta, Dhaqanka iyo Dalxiiska ee Xukuumadda Federaalka Soomaaliya Mudane Maxamed Cabdi Xayir Maareeye oo si rasmi ah u furay tartan cilmiyeedka bisha barakeysan ee Ramadaan ayaa ugu horeyn Ummadda Soomaaliyeed ugu hambalyeeyay bisha Ramadaan, waxaana uu Alle ka baryay in Soomaaliya uu Alle dhibaatada ka qaado, bulshaduna ay is cafiyaan.
Wasiirka ayaa xusay in uu aad ugu faraxsanyahay in sanadkasta uu horumar sameynayay, sanadkana horumarka uu sameeyay ay tahay in Telefishinka Qaranka iyo Radio Muqdisho ay si wada jir ah ugala socon karaan, isagoo xusay in ay fursad u tahay dhamaan degmooyinka ka qeyb galaya.
“Runtii wax yaabaha lagu tartama waxa ay ahayd mid dadku ay isku bartaan, runtii barnaamijka Kadis ayuu uga dhiganyahay, Agaasimeyaasha iyo inta kale ee ka qeyb qaadatay waan u mahadcelinayaa, runtii waan ku rajo weynahay in aqoon laga kororsan doono, runtii gobolka Benaadir ayaa markale taaba gelinaya tartanka, waana ku amaaneynaa guddoomiyaha gobolka Benaadir in uu howlfiican bulshada u haya, isla markaana ay mashaariic kala duwan ay caasimadda ka fuliyeen, doorka lagu taageerayo dowladda dhexe iyo hay’adaha kale ee dowladda”
Wasiirka Warfaafinta ee Xukuumadda Soomaaliya Mudane Maxamed Cabdi Xayir Maareeye ayaa ugu baaqay bulshada Soomaaliyeed inay is caawiyaan oo ay ka qeyb qaataan afurinta dadka walaalahood ee aan waxba heysan, waxaana uu Wasiirku uu si rasmi ah u furay tartan cilmiyeedka bisha barakeysan ee Ramadaan.
Tartankii ugu horeeyey ee Tartan cilmiyeedka Ramadaan ee sanadkan ayaa waxaa caawa lagu daah furay tartameyaasha degmooyinka Yaashqiid ee Gobolka Benaadir vs Dhahar oo ka tirsan gobolka Sanaag.
Sawir Qaade: Farxaan Suleymaan Daahir
