Tababarkan oo socon doona muddo 5 maalmood ah ayna soo qaban qaabisay Wakaaladda Filmada ee Wasaaradda Warfaafinta ayaa waxaa furitaankiisa ka qeybgalay Wasiirka Wasaaradda Warfaafinta Dhaqanka iyo Dalxiiska Mudane Daa’uud Aweys Jaamac, Ku-simaha agaasimaha guud ahna agaasimaha maamulka iyo Maaliyadda Cabdinaasir Xasan Xuseen, Prof Cabdullaahi Sheikh Cali Qaloocow Wasiir ku-xigeenkii hore ee Maaliyadda iyo qaar kamid ah agaasimeyaasha waaxyaha ee Wasaaradda.
Inta uu socdo waxaa lagu baran doonaa casharo laxiriira habka sameynta iyo soo saarista Filmada bulshada loo gudbinayo, waxaana bixinayaa khabiir sare Cabdulqaadir Axmed Buufalo oo hore uga tirsanaan jiray maamulkii Wakaaladda Filmada Soomaaliyeed xiligii dowladii dhexe ee Soomaaliya.
Ku-simaha agaasimaha guud Cabdinaasir Xasan Xuseen ayaa kula dardaarmay ka qeybgalayaasha tababarka in ay ka faa’iideystaan, isagoo xusey tababar nuucaan ah ay dunida qiimo weyn ah ku fadhiyaan.
Wasiirka Wasaaradda Warfaafinta Dhaqanka iyo Dalxiiska Mudane Daa’uud Aweys Jaamac oo si rasmi ah u furay tababarkan wuxuu si weyn uga hadlay muhiimada ay leeyihiin Filmada gaagaaban ee bulshada loo gudbinayo, kuwaasi oo xambaarsan fariimo wacyigelineed oo nuuc kasta leh, wuxuuna bogaadiyay dadaalka uu bixinayo Cabdulqaadir Buufalo oo ah khabiir in muddo ah ku noolaa dalka Koonfur Afrika.
Madaxda Wasaaradda Warfaafinta ayaa dadaal ugu jira sidii Wakaaladda Filmada oo kamid ah qeybaha Warbaahinta ee Wasaaradda maqaambkeedi dib loogu soo celin lahaa.
