Wasiirka Warfaafinta, Dhaqanka iyo Dalxiiska Mudane Daud Aweis Jama,oo ku hadlaya magaciisa iyo magaca hawlwadeennada kala duwan ee Wasaaradda ayaa waxaa uu tacsi tiiraanyo leh u dirayaa qoyskii, eheladii, bahda Saxaafadda iyo dhammaan ummadda Soomaaliyeed ee uu ka geeriyooday Marxuum Ciise Faarax Maxamed oo ahaa khabiir dhinaca saxaafadda oo muddo dheer wasaaradda ka soo hawlgaley.
Wasiirka, ayaa sheegay in Ciise Faarax uu ka mid ahaa tiirarkii wargeyska afka dowladda ku hadla iyo Wakaaladda Wararka ee SONNA, isla markaana uu kaalin weyn ka soo qaatey horumarinta saxaafadda dalka.
Wasiirka ayaa marxuumka Ilaahay uga baryey inuu naxariistii Jannatul Fardowsa ka waraabiyo, qoyskii iyo ehaladii iyo bahda saxaafadda ee uu ka baxayna uu samir iyo iimaan Ilaahay ka siiyo.
Aamiin, Aamin, Aamin.
