Wasiirka Wasaaradda Warfaafinta Dhaqanka iyo Dalxiiska Mudane Cismaan Abokor Dubbe ayaa maanta kulan soo dhoweyn iyo is barasho ku dhisan la’ yeeshay Safiirka cusub ee Jamhuuriyadda Dadka China u soo magacawday Soomaaliya Mr FEI Shengchao.
Wasiirku waxa uu kala hadlay Safiirka sii xoojinta cilaaqadka iyo sooyaalka soo jireenka ah ee labada Waddan, gaar ahaan arrimaha warbaahinta iyo qaybaheeda kala duwan oo horeyba ay isaga kaashan jireen labada waddan.
Wasiir Dubbe ayaa Danjire Fei u rajeeyey wanaag iyo in uu ku soo dhowaado quruxda iyo hawada fiican ee Jamhuuriyadda Federaalka Soomaaliya, kana shaqeeyo sii kobcinta xiriirka qotada dheer ee labada waddan ee China iyo Somalia.
Wasiirka waxa kulankaas ku wehelinayey Agaasimaha Wakaalada Wararka Soomaaliyeed ee SONNA Cabdiraxman Axmed Xuseen iyo Agaasimaha Maamulka iyo Maaliyadda ee Golaha Murtida iyo Dhaqanka Mudane Ismaaciil Oranje. Dhanka Safiirkana waxa kulanka ku wehilanayey madaxa siyaasadda ee Safaaradda China.
