Wasiirka Wasaaradda Xanaanada Xoolaha, Dhirta iyo Daaqa ee Dowlad Goboleedka Jubbaland Maxamed Nuur Cali Cabdullaahi ayaa digniin ka soo saaray tacadiyada loo geysto Xayawaanka, isgoo inta ku daray inay wadaan qorsheyaal lagu horumarinayo dhaqashada xoolaha.
Mudane Maxamed Nuur oo u waramay Radio Muqdisho ayaa sheegay in digniinta ay timid markii ay xafiiskooda ay soo gaareen cabashooyin dhowr ah, ayna ka go’antahay in tallaabo sharci ah laga qaadi doono ciddii lagu arka iyada oo ku xadgubeysa Xayawaannada dhanka gaadiidka loogu adeegsado iyo dhaanka.
“Waxaa maalmahan dambe Wasaaradda soo gaarayay dacwado la xiriirta tacadiyo lagula kacayo gaadiidka la rarto, gaar ahaan Dameeraha, Dibiyada iyo Awrta, maadaama ay Wasaaradda ay waajib ka saarantahay inay ilaaliso xaquuqda xayawaanaadka iyo dhaanka ee ana hadli Karin waana rajeynayaa in digniinta ay dhaqan gasho, waxaana ka dignay in la ilaaliyo gaadiidka la rarto oo dhanka wanaagsan loogu adeegsado oo aan la siinin daroogo si loogu shaqeysto waqti dheeraad ah”. Ayuu yiri Wasiirka Xanaanada Xoolaha Jubbaland.
Wasiirka Wasaaradda Xanaanada Xoolaha, Dhirta iyo Daaqa ee Dowlad Goboleedka Jubbaland ayaa xusay inay wadaan wacyigelin la siinayo bulshada, si ay habka wanaagsan uga faa’iideystaan xoolaha.
“Wasaaraddu waxa ay sidoo kale wadaa horumarinta xoolaha, si suuq loogu helo xoolaha dalka, dadka xoolo dhaqatadana lagu dhirigeliyo dhaqashada xoolaha, maadaama ay jiraan dad badan oo ku tiirsan dhaqashada xoolaha, lagana hortago xaalufinta deegaanka”. Ayuu yiri Maxamed Nuur.
Maxamed Nuur Cali Cabdullaahi ayaa ugu dambeyn tilmaamay inay qaban doonaan tababaro la siinayo xoola dhaqata ayna jiri doonaan guddi kormeera arrintaas, isagoo intaa ku daray inay jiraan dhakhaatiir Wasaaradda u diiwaangashan oo baaris ku sameeyo faya dhowrka xoolaha la gowracayo.
