Wasiirka Amniga ee Xukuumadda Soomaaliya oo uu wehliyo Guddoomiyaha Gobolka Benaadir ayaa maanta booqday xarunta Degmada Wadajir oo kooxo argagixiso ka tirsan Al-Shabaab ay la eegteen gaari laga soo buuxiyay waxyaabaha qarxa.
Mas’uuliyiinta ayaa soo kormeeray xarunta degmada iyo hareeraheeda oo ah halka uu saameeyay qaraxa, kaasi oo ay ku dhinteen in ka badan 10 ruux halka tiro intaa ka badan ay ku dhaawacmeen oo u badnaa shacab iyo maamul ku sugnaa xarunta degmada.
Related posts
Dadkii ku dhaawacmay waxaa ka mid ahaa Guddoomiyaha Degmada Axmed Cabdullaahi Xasan, Xoghayaha degmada, Guddoomiyaha Ururka Haweenka ee degmada, iyadoo uu bur buray dhismaha xarunta Degmada iyo dhismayaal kale oo xarunta ka agdhawaa.
Wasiirka iyo wafdiga la socday ayaa sidoo kale booqday dhaawacyada la gaarsiiyay isbitaalada qaar, gaar ahaan Isbitaalka kuwaasi oo u kuurgalayay xaaladda dadkii ku soo dhaawacmay falkaasi argagixiso.
Madaxa caafimaadka ee Isbitaal Madiina Duniyo Axmed Cali oo la hadashay Radio Muqdisho ayaa tilmaamtay in isbitaalka la soo gaarsiiyay 14 ruux, kuwaasi oo qaarkood xaaladooda caafimaad ay iminka liidato, halka ay jiraan kuwa qaba dhaawacyo fudud.
Dhinaca kale Wasiirka Caafimaadka ee Xukuumadda Soomaaliya oo booqatay Isbitaalka Recep Tayyip Erdogan oo la dhigay 15 ruux oo ku dhaawacmay qaraxii maanta ayaa xog ka dhageysatay xaaladda bukaanada Agaasimaha Isbitaalka oo u sheegay in labo ka mid ah dhaawacyada maanta ay yihiin kuwa aad u daran xaaladooda caafimaad, waxaana ay Alle uga bariday in uu janada ka waraabiyo dadkii ku dhintay halka kuwa ku dhaawacmay ay Alle uga bariday in uu bogsiiyo.
Gaariga ku qarxay xarunta Degmada ayaa ahaa nuuca loo yaqaan Hoomeey oo laga soo buuxiyay waxyaabaha qarxa.
ย 
