Kulankan oo isugu jiray tacsi iyo baaq nabadeed oo ku wajahan beelo walaalo ah oo ku dagaalamaya deegaanka Dhumay ee gobolka Sool, ayaa waxaa ka soo qeyb galay wasiiro iyo xildhibaano ka tirsan golaha shacabka kuwaas oo ka damqaday colaada xilligan taagan oo sababtay dhimasho iyo dhaawac.
Xildhibaan Axmed Maxamed Axmed iyo Xildhibaan Canab Xasan Cilmi oo ka tirsan golaha shacabka ayaa dadka dagaalamaya ugu baaqay ineey dagaalka joojiyaan si looga baaqsado dhiig dambe oo daata.
Wasiirka Kalluumeysiga iyo Kheyraadka badda Cabdulaahi Bidhaan Warsame ayaa sheegay inaan loo baahneyn in qof kale uu ku dhinto dagaalkaas oo dhexmaraya dad walaalo ah oo aanan aqoon waxa ay isku dilayaan.
Wasiirka Arimaha Dibadda Soomaaliya Axmed Ciise Cawad ayaa culimada iyo dadka waxgaradka ah ka dalbaday ineey wax walba u sameeyaan sidii dagaalka loo joojin lahaa.
Baaqan nabadeed ayaa daba socda baaq dhawaan ka soo baxay madaxda sare ee dalka kaas oo dadka dagaalamaya looga dalbaday ineey si shuruud la’aana u joojiyaan dagaalka ka socda gobolka Sool oo sababay dhimasho iyo dhawac soo kala gaaray dadka walaalaha ee dagaalamaya.
