Shirkan oo 3-dii bil mar la qabto ayaa lagu soo bandhigaa waxqabadka hay’adda socdaalka iyo Jinsiyadda, waxaana ka qeybgalay Wasiiro ka tirsan Xukuumadda Federaalka, Taliyaha Ciidanka Booliska, Guddoomiye ku-xigeenka Amniga iyo siyaasadda gobolka Banaadir, laamaha socdaalka ee ka howlgala dowlad Goboleedyada, Maareeyaha Garoonka Aadan Cadde, ururka dhallinyarada Gobolka Banaadir iyo marti sharaf kale.
Agaasimaha guud ee hay’ada socdaalka iyo Jinsiyadda Jamhuuriyadda Federaalka Soomaaliya Kornel Maxamed Aadan Koofi ayaa sheegay in hay’adda socdaalka lagu qiimeeyo waxqabadka ay qabteen, isagoo bogaadiyay howsha ay hayaan shaqaalaha hay’adda.
Guddoomiye ku-xigeenka Amniga iyo siyaasadda gobolka banaadir Cali Cabdi Wardheere (Cali Yare) ayaa balanqaaday in maamulka gobolka uu xoojinayo wadashaqeynta kala dhexeysa Hay’adda socdaalka iyo jinsiyadda.
Taliyaha Ciidanka Booliska Soomaaliyeed Jeneraal Cabdi Xasan Maxamed Xijaar ayaa soo jeediyay in la joogteeyo shirarka noocaan oo kale ah si xal loogu helo caqabadaha ka jira adeegyada Hay’adda socdaalku bixiso.
Mudane Cabdullaahi Sheekh Cali Qaloocow Wasiir ku-xigeenka Maaliyadda ayaa bogaadiyay isbadalka ka muuqda shaqada hay’adda, wuxuuna codsaday in la dhiirageliyo shaqaalaha la yimaada shaqa karnimada.
Wasiiru dowlaha Wasaaradda Amniga ee Xukuumadda Federaalka Soomaaliya Mudane Farxaan Cali Axmed ayaa sheegay in kan Wasaarad ahaan ay gacan ka geysanayaan daadajinta meel marinta sharciyo ay hay’addu leedahay, kuwaas oo horyaalla Baarlamaanka.
Wasiirka Wasaaradda Gaadiidka iyo Duulista Hawada ee Xukuumadda Federaalka Soomaaliya Mudane Duraan Axmed Faarax ayaa dul istaagay muhiimadda ay hay’addu u leedahay dalka.
Tan iyo bishii Janaayo ee sanadkan lama qaban shirkan oo lagu soo bandhigo waxqabadka iyo qorshaha hay’adda, waxaana sabab u ahaa saameynta cudurka COVID-19.
