Wasaaradda Arimaha Dastuurka Galmudug oo mudooyinkan Dowladda Federaalka kala shaqeynaysay latashiyada bulshada ee dhameystirka qabyo qoraalka Dastuurka Dalka ayaa maanta magaalada Samareeb ka daah-furtay kulan ay ka qayb galayaan bahda garsoorka iyo culimada magaalada, laguna gorfeynayo gaba gabeynta qabyo qoraalka 2-aad ee Dastuurka Dalka iyo u diyaar garowga qaybyo qoraalka 3-aad ee hannaanka dib u eegista dastuurka
Kulankan oo soconayo mudo 3-maalmood ah ayaa waxaa daah furkiisa ka qayb galay Agaasimaha Guud ee Wasaaradda Dastuurka Galmudug Cumar Axmed Sheekh Aadan iyo Guddoomiye ku-xigeenka Amniga iyo siyaasadda Caasimada Galmudug Cabdi Xaashi Caroole, waxaana muddada kulankan uu socdo laga doodi doonaa qodobo waaweyn oo ka mid ah Dastuurka oo ay gaban gabo mareyso qabyo qoraalkiisa 2-aad.
Guddoomiye ku-xigeenka Amniga iyo siyaasada Caasimadda Galmudug Cabdi Xaashi Caroole oo ugu horeen kulanka daah furay ayaa u jeediyay ka qayb galayaasha in ay keenaan aragtiyo wax gal ah oo qayb ka noqda gaba gabada qabyo qoraalka labaad ee Dastuurka.
Agaasimaha Guud ee Wasaaradda Dastuurka Galmudug Cumar Axmed Sheekh Aadan ayaa tilmaamay in bulshada uu ahmiyad u leeyahay fikir aruurintii muddada dheer soo socotay ee laga sameeyay deegaano badan oo ka mid ah Gobolada Dalka, isagoo intaa ku daray in bulshada Galmudug dhankooda looga fadhiyo inay talo ku darsadaan qabyo qoraalka dastuurka dalka.
