Ciidamada Booliska Pakistan ayaa sheegay in kooxa mintidiin Islaami ah ay galinkii danbe ee shalay ay weerar ku qadeen goob laga soo saaro Shidaalka oo ku taalla waqooyi galbeed ee dalkaasi, halkaas oo ay ku dileen afar xubnood oo ka tirsan Boolis Pakistan iyo laba ka mid ah Shaqaalaha Shidaalka.
Irfan Khan, oo ah sargaal ka tirsan booliska Pakistan ayaa wakaaladda wararka ee Reuters u sheegay in weerarkan uu ka dhacay xarun ay maamusho shirkada Pakistan Oil and Gas oo ku taalla degmada Hangu, una dhow xadka ay la wadagaan Afghanistan.
Sargaalkan ayaa intaa ku daray in weerarkan ay fuliyeen maleeshiyaad ka tirsan kooxaha mintidiinta ee ka dagaalama qeybo ka mid ah dalka Pakistan.
Dhowr kooxood oo mintidiin ah, oo ay ka midyahiin faraca Taalibaan ee Pakistan, ayaa muddo sanado ah ka dagaalamaya dhaca waqooyi-galbeed ee dalkaasi Pakistan, kuwaasi oo si joogta ah weerarro ugu qaada ciidamada ammaanka iyo kaabayaasha dhaqaalaha ee Dowladda.
