Safaarada dowlada Soomaaliya ay ku leedahay dalkani Kenya ayaa maanta laga dhex furay xafiis qaabilsanaan doono isku xirka qaxootiga soomaaliyeed ee nool dalkani Kenya iyo dowlada Soomaaliya.
Xafiiskan ayaa waxaa maanta xarunta safaarada ka furay gudoomiyaha hay’adda barakacyaasha iyo qaxootiga qaranka Axmed Nuur iyo safiirka dowlada Soomaaliya u qaabilsan dalkani Kenya Jamaal Maxamed Xasan.
Danjiraha dowlada Soomaaliya u qaabilsan dalkani Kenya Jamaal Maxamed Xasan ayaa sheegay in xafiiskani uu isku xiri doono qaxootiga soomaaliyeed ee ku nool dalkani Kenya iyo dowlada Soomaaliya.
“Ujeedada aan xafiiskan u furnay waxaa waaye,sida aad la socotaan waxaa jira heshiis seddax geesood ah oo ka dhaxeeya dowladaha Soomaaliya iyo Kenya iyo hay’adda qaramada midoobay u qaabilsan qaxootiga ee UNHCR,waxaan rabnaa maadaama dad badan oo qaxooti soomaaliyeed ah ee dalkan joogaan waa in xafiis laga sameeyo halkan sida ku qoran heshiiska seddax geesoodka ah si uu u xiriiriyo baahida dadkaasi soomaaliyeed iyo dowlada,marka waxaa uu xafiiskan qaban doonaa waxyaabaha ay u baahanyihiin in qaxootiga soomaaliyeed loo qabto”Ayuu Yiri Danjire Jamaal.
Gudoomiyaha hay’adda barakacayaasha iyo qaxootiga qaranka Axmed Nuur ayaa isna sheegay in shaqada ugu muhiimsan oo uu xafiiskan qaban doono tahay labo qodob oo kala ah.
Tan koobaad waa In gudiga farsamada ee heshiiska seddax geesoodka ah uu xafiiskan kala shaqeeyo howlaha ay qabanayaan iyo tan labaad oo ah sida uu heshiisku qorayo in labada dowladood ay safaaradahooda ku yeeshaan xiriiriyaal iyo sidoo kale in ay qunsuliyadaha kala shaqeeyaan sidii dadka soomaalida ah gacan loogu siin lahaa sidii ay dalkooda ugu noqon lahaayeen,taasina waxa ay cadeeyneysaa sida ay dowlada Soomaaliya uga go’antahay sidii dadka soomaaliyeed ay dalkooda ugu laaban lahaayeen,iyadoo aan la qasbeynin oo waliba laga bixinayo tasiilaadkii ay ku laaban lahaayeen.
Dhinaca kale qunsulka safaarada Soomaaliya ay ku leedahay dalkani Kenya Cali Maxamed Shiikh (Cali begadi) ayaa shacabka soomaaliyeed ee ku nool dalkani Kenya ugu bishaareeyay in muddo 15 maalin gudahooda ah ku heli doonaan baasabooradoda marka ay codsadan kaddib.
“Waxaa rabaa in fariin u gudbiyo shacabka soomaaliyeed ee ku nool dalkani Kenya,sida aad la soctaan seddaxdii bil ee ugu danbeysay ee kala ahaa Augusto,September iyo October dadkii codsaday baasaboorada soomaaliga ah wey ka daaheen,waxana arrintaasi sababay kala guur ka jira xafiiska isbedel ayaa ka dhacay,kadibna waxaan galnay dib u dhiska safaaradda,marka waxaan rabaa in dadkii seddaxdasi bil codsaday baasaboorada ay imaadaan xarunta safaaradda si ay u qaataan baasabooradooda”ayuu Qunsul Cali Begadi.
Cali begadi ayaa intaasi ku daray hada wixii ka danbeyaa laga bilaabo maalinta uu qofka muwaadinka codsado baasaboorka Soomaaliga ah uu heli doono muddo 15 maalmood ah.
Sawir qaade:-Xasan Cumar Baffo
