Waxaa xalay magaalada Muqdisho ka dhacday xaflad weyn oo lagu abaalmariyey tartamayaasha degmooyinkii kaalimaha hore ka galay tartan cilmiyeedkii bishii Ramadaan ay qabatay Warbaahinta Qaranka Soomaaliyeed.
Wasiirrada warfaafinta iyo wasiirka arrimaha gudaha ee XFS, wasiirrada waxbashada dowladda federaalka iyo Galmudug, guddoomiye ku xigeenka amniga iyo siyaasadda ee maamulka gobolka Banaadir, xubno ka tirsan BFS, maamulka Bangiga IBS, masuuliyiinta warbaahinta qaranka iyo marti sharaf badan ayaa ka soo qeyb galay xafladaan lagu soo gunaanaday tartan aqooneedkii bisha Ramadaan.
Degmooyinka Dhuusamareeb, Gaalkacyo iyo Hodan oo kala galay seddaxda kaalimood ee ugu horeysa tartanka ayaa caawa xafladaan lagu guddoonsiiyey koobka, waxaana dadaalkooda ugu hambalyeeyey masuuliyiintii ka soo qeyb gashay munaasabadda.
Sidoo kale degmooyinka kaalimaha hore ku guuleystay ee tartanka ayaa lagu abaal mariyay lacago loogu talagalay tartan Cilmiyeedka Warbaahinta Qaranka, waxaana tartamayaasha Degmada Dhuusamareeb oo sanadkan ku guuleysatay tartanka ay heshay lacag dhan 2,000 (Labo kun oo dollar), halka tartamayaasha Gaalkacyo oo kaalinta 2-aad ka galay tartanka ay heleen 1,500 (kun iyo Shan boqol oo dollar) waxaana kaalinta 3-aad gashay Hodan oo iyana heshay lacag dhan 1,000 (Kun dollar).
