Qaban qaabada munaasabad ballaaran oo lagu xusayo 26-ka Jun oo ah markii gabollada waqooyi ee dalkeenna ay ka xoroobeen gumeystihii Ingiriiska ayaa caawa ka socota magaalada Muqdisho.
Xafladda xuska 26-ka Jun ayaa caawa ka dhaceysa xarunta maamulka dowladda hoose ee Xamar “Fisho Governo” waxaana ka qeybgelidoona madaxda ugu sarreysa dalka, sida madaxweynaha, guddoomiyaha Baarlamanka, wasiirro, xildhibaanno, mas’uuliyiin kale oo ka tirsan dowladda, ururrada bulshada iyo marti sharaf kale.
Munaasabadda ayaa la filayaa in caawa lagu soo bandhigo heeso waddani ah iyo suugaan ka tarjumeysa qiimaha xorriyadda, iyo halgankii adkaa ee loo soo galay madaxbannaanida dalkeenna, iyadoo halkaasi laga xusi doono halyeeyadii naftooda ku waayay gobanimada aynu manta heysano.
26-ka Jun sanadki 1960-ki ayeey aheyd markii gobollada waqooyi ay ka xoroobeen gumeystihii Ingiriiska, iyadoo Afar maalmood kadib 1-di Lulyo ay gobollada Koofureed ka xoroobeen gumeystihii Talyaaniga sidaana ay ku dhalatay jamhuuriyadda Soomaaliya.
