Munaasabada lagu furayay xaruntani cilmi baarista iyo tababarada Galmudug oo maanta magaalada Cadaado lagu qabtay ayaa waxaa ka soo qaybgalay mas’uuliyiin ka tirsan golayaasha wasiirada iyo Baarlamanka Galmudug, aqoonyano iyo marti sharaf kale.
Axmed Maxamed Axmed Agaasimaha guud ee xaruntan cilmi baarista ayaa ka warbixiyay waxyaabaha ay qabandoonaan iyo cilmi baaristu muhiimadda ay deegaanka u leedahay.
Cilmiga, tababarada iyo wax alaala wixii baaris ah oo aan rabno inaan ka samayno deegaanka inaan la kaashano dadka, waxaa naga go’an inaan ka gudbin Dastuurka Galmudug, inaan dawladda Soomaaliya la shaqayno, waxaa naga go’an markaan rabno inaan cilmi baaris samayno inaanan hotelada fariisan, anaga ayaa u tagayna, wiilka Geela jira anaga ayaa soo waraysanayna, iyada oo maqal iyo muuqaal ah ayaan u soo gudbinaynaa wasiirada iyo xildhibaanada” ayuu yiri Mr Axmed Maxamed Oo ah Agaasimaha xaruntani.
Xildhibaan Xasan Xirsi Shidane oo ka mid ah Baarlamaanka Galmudug ayaa sheegay in uu xaruntani u arko mid muhiim ah.
“Waxaa laga yaabaa hay’adii ku fiicnayd dhirta inay aado kaluunku meeshuu jiro iyo Badda, waxaan marka soo dhawaynaynaa daraasad ay Galmudug leedahay oo aruursan oo diyaarsan dowladuna ka warqabto in meel laga heli karo ay jirto, hay’ad walba waxa ay ku fiicantahay meesha ay jiraan in loo tilmaamo aadbaan u soo dhawaynaynaa” ayuu yiri Xildhibaan shidane.
wasiirka madaxtooyada Galmudug Xuseen Qaasim Iidow oo isna ka hadlay furitaanka xaruntan ayaa sheegay in maamulka ay wax badan ka saacidi doonto.
“Maanta oo dawlad goboleedka Galmudug ay jirsatay bishii labaad waxaa hormar wayn ah inaan yeelano hay’ad ay ku midaysanyihiin dadkeena aqoonta iyo maskaxda leh oo hadana u taagan inay baaris ku sameeyaan baahida bulshada, horumar aad u wayn oo muddo kooban lagu gaaray” ayuu yir Iidow.
Cilmi baarista oo horay aan ugu xooganayn Deegaanada Galmudug ayaa hadda laga filayaa xaruntan inay daaha ka qaado macluumaad badan oo nolosha bulshada muhiim u ah.
Sawir Qaade: Maxamuud Cabdi Diirshe
