Guddoomiyaha Gobalka Mudug ee Dowlad Gobaleedka Galmudug Mudane C/rashiid Xaashi Cartan ayaa maanta si rasmi ah xariga uga jaray xarun loogu talagalay in dhallinyaradu ay ka faa iideeystaan barnaamijyada la xariira is dhax galka bulshada iyo horumarinta Nabadda Gobalka, taasoo hirgalinteeda ay iska kaashadeen maamulka Gobalka, Hay’adda S.S.F iyo Ganacsade Soomaaliyeed oo ku nool dalka dibadiisa.
Munaasabada furitaanka xaruntaan oo ay kasoo qeyb galeen masuuliyiin iyo xubno ka socday ururada dhallinyarada iyo bahda Isboortiga ayaa waxaa ugu horeyn ka hadlay Farxaan Yuusuf Aadan oo ka mida Howlwadeenada xarunta lagu qabanayo tartanka.
“Xaruntaan waa xarun loogu tala galay in dhallinyaradu ay madadaalo ka helaan oo ay kaga baxaan tahriibka iyo ficilada xun xun, xaruntu isboorti kaliya maahan ee waxay sidoo kale leedahay laybareeri aan ugu tala galnay waqtiyada ay firaaqada leeyihiin ineey wax ka aqristaan, waxaana yaala kutubtii oo nooc walba leh maadi iyo Diini, waxaa kaloo halkaan aan ku aheynaa tababar kumbuyuutar oo 6 bilood ah sidaa darted waxaa loo baahan yahay in dhallinyaradu ay ka faa ideeystaan fursadan nasiibka u yeesheen” ayuu yiri Farxaan.
Guddoomiyaha Gobalka Mudug C/rashiid Xaashi Cartan oo isna ka hadlay munaasabada ayaa ugu horeyn uga mahad celiyay Hay’adda S.S.F sida ay uga gacansiiyeen hirgalinta xaruntaan, isagoo dhanka kalana sheegay in dhallinyaradu ay kaga faa iideystaan xaruntaan ka shaqeeynta isdhaxgalka bulshada Gobalka si looga gudbo colaadaha iyo dhibaatada ka taagan Magaalada Galkacyo iyo guud ahaan Gobalka.
Qaar ka mida dhallinyaradii munaasabadda ka soo qeyb galay oo aan la dhax qaaday makaroofanka Warbaahinta Qaranka ayaa dhankooda ka hadlay dareenkooda waxaana ay si weyn usoo dhaweeyeen hirgelinta xaruntaan oo ay ku tilmaameen in ay tahay mid ay kaga faa’ideeysanayaan isdhaxgalka bulshada iyo ka shaqeynta Nabadda.
Cabdirisaaq Maxamed Axmed
