Xeer ilaaliyaha qaranka ayaa sheegay in tallaabada ugu horreysay ee ay dowladdu qaadeyso in ay tahay sidii tirakoob saxan loogu sameyn lahaa Hantida Qaranka Soomaaliyeed.
Dr. Axmed Cali Daahir Xeer-ilaaliyaha Qaranka, ayaa sheegay in muhiim ay tahay tirakoob saxan oo lagu sameeyo Hantida Qaranka uu leeyahay, isla markaana ay dowladdu ka soo saarto Siyaasad sharciyeesan, lana jideeyo Sharciga iyo guddiga Iibka Qaranka.
Sidoo kale dadka deggan dhulka ay dowladdu leedahay ayuu tilmaamay in ay tahay in qorshe loo sameeyo oo laga saaro si dhulku uu ugu soo laabto hay’adihii lahaa oo shaqo qaran ku qaban doona.
“Tallaabada koowaad ee in la qaado ay tahay waa in dhulka(dowladdu leedahay) tirokoob lagu sameeyo” ayuu yiri xeer ilaaliyaha oo sheegay in ay lagama maarmaan tahay in dhammaan dhulka dowladdu leedahay la banneeyo ayadoo siyaasad lagu wajaho ay lagama maarmaan tahay.
Dhulka ay shacabku deggan yihiin ee ay dowladdu leedahay ama ay barakacayaashu ku nool yihiin ayaa u baahan sidoo kale in laga saaro ayadoo dadka loo raadinayo meelo ay ku noolaadaan.
“Haddii ay noqoto in la iibiyo dhulka oo shacabka lagu wareejiyo waxay u baahan tahay in la howl galiyo oo ay shaqadaas qabtaan guddiga iibka qaran” ayuu sii raaciyay Dr. Axmed Cali Daahir.
