Wararka ka imaanaya gobolka Mudug ayaa sheegaya in saaka ay xiisad colaadeed ka taagan tahay deegaanka Sar-Janaale oo qiyaastii 50 km dhanka bari kaga beegan magaalada Gaalkacyo ee xarunta gobolka Mudug.
Guddoomiye ku xigeenka maamulka gobolka Mudug ee Galmudug, Cabdi Sheekh Xuseen oo la hadlay Radio Muqdisho ayaa sheegay in dagaalkaas uu ka bilowday xoolo la kala dhacay isla markaana uu halkaas ka qarxay dagaal u dhaxeeya labo maleeshiyo beeleed oo deegaankaas wada dega.
Tiro dhimasho iyo dhaawac ah oo u badan dhinacyadii dagaalka uu dhexmaray ayaa lagu soo waramayaa in dagaalkaas uu ka dhashay inkastoo ilaa iyo hadda aan la heynin tirada khasaaraha ah ee dagaalka uu dhaliyay.
Wariyaha warbaahinta qaranka ee gobolka Mudug C/risaaq Maxamed Axmed ayaa soo sheegaya in saaka xaaladda deegaanka ay tahay mid degan oo aan wax iska hor imaad ah aysan ka jirin, inkastoo waqti kasta la filan karo in mar kale dagaalka uu dib u bilowdo maadaama maleeshiyaadkii shalay dirirta dhexmartay ay wali halkaas isku hor fadhiyaan.
Ilaa iyo hadda ma jirto wax waan waan ah oo lagu daminayo dagaalka shalay ka bilowday deegaanka Sar Janaale ee hoos yimaadka degmada Gaalkacyo, wararka qaar ayaa sheegaya in dagaalka ay ku lug leeyihiin maamulada Galmudug iyo Puntland, hase yeeshee ma jiro wax war ah oo labada dhinac ka soo baxay oo warkaas xaqiijinaya.
