Xildhibaan Cabdiqaadir Cismaan Cabdisalaan (Kheyraat) oo ka mid ah Xildhibaannada maamulka Hirshabeelle ayaa ku baaqay in gurmad deg deg ah la gaarsiiyo dadkii ay saameynta ku yeelatay abaarta ka jirta qeybo kamid ah dalka, gaar ahaan deegaannada dowlad goboleedka Hirshabeelle.
Xildhibaan Cabdiqaadir Kheyraat oo la hadlay Radio Muqdisho ayaa sheegay in abaaro baahsan ay ka jiraan qeybo ka mid ah dalka, waxaana uu intaa ku daray in shacabka Soomaaliyeed kuwooda wax heysta ay isu gurmadaan, isla markaana ay caawiyaan walaalahood ay abaartu saameysay.
Xildhibaan Cabdiqaadir Cismaan Cabdisalaan ayaa tilmaamay in Xildhibaanada dowlad goboleedka Hirshabeelle ay sameyn doonaan kulan looga hadlayo sidii gurmad loo gaarsiin lahaa shacabka Soomaaliyeed ee ku habsatay abaarta.
“Waxaan ugu baaqayaa dowlad goboleedka Hirshabeelle oo aan ka mid ahay, dowladda Federaalka ah ee Soomaaliya iyo beesha caalamka inay gurmad gaarsiiyaan dadka abaartu saameysay” ayuu yiri Xildhibaan Cabdiqaadir Cismaan Cabdisalaan oo ka mid ah mudanayaasha Baarlamaanka Hirshabeelle.
Xildhibaan Kheyraat ayaa horey kulamo looga hadlayo sidii gurmad loogu fidin lahaa dadka ay abaartu saameysay la qaatay qeybaha bulshada ee Jowhar ku nool.
