Mudane ka tirsan Baarlamaanka Soomaaliya ayaa ku baaqay in xal kama dambeys ah laga gaaro colaadda ku soo laab laabatay Gobolka Hiiraan ee bartamaha Dalka, Isagoo dhinaca kale ka codsaday Baarlamaanka in ay codka kalsoonida ah siiyaan xukuumadda cusub ee uu dhawaan soo dhameystiray Ra’iisul wasaaraha Xukuumadda Soomaaliya Mudane Cumar Cabdirashiid Cali Sharma’arke.
Xildhibaan Maxamed Cumar Dalxa oo la hadlay Radio Muqdisho ayaa sheegay in ka baarlamaan ahaan ay aad uga xunyihiin colaadda ku soo laab laabatay gobolka Hiiraan, isagoo tilmaamay in colaadaasi ay sababtay barakac hor leh, taasi oo aan xilligan ay dhibaato ku tahay dadka rayidka ah.
“Waxaan ugu baaqayaa waxgaradka, aqoonyahanada iyo dadka kale ee gacan ka geysan kara inay joojiyaan colaadda ka taagan gobolka Hiiraan, waxkastana lagu dhameeyo wada hadal, Dowladda Soomaaliyana dhankeeda haka qeyb qaadato daminta colaadda, waayo dhibaatooyin iyo dib u dhac hor leh ayay u keeneysa horumarka Soomaaliya” ayuu yiri Xildhibaan Dalxa.
Xildhibaanka ayaa sidoo kale ka codsaday mudanaasha baarlamaanka inay codka kalsoonida ah siiyaan Xukuumada cusub, maadaama looga fadhiyo inay qaadato doorka uga aadan colaadaha iyo xasilinta dalka, jiheynta siyaasadda guud ee dalka, waxaana uu intaa ku daray in Xildhibaanada ay codka kalsoonida ah siiyaan si loo gaaro hiigsiga cusub.
