Madaxweynaha maamulka Jubbaland Axmed Maxamed Islaam oo shir jaraa’id ku qabtay xarunta madaxtooyada Jubbaland ee magaalada Kismaayo ayaa ku dhawaaqay in la kordhinayo Baarlamaanka Maamulka Jubba kaddib markii Dowladda ay ku talisay in la kordhiyo baarlamaanka si meesha looga saaro tabashooyinka ay qabaan beelaha qaar.
Madaxweynaha maamulka Jubbaland ayaa ku xusay in baarlamaanka jubba land lagu kordhinayo 10 xubnood si meesha ay u ugu tabashooyinka soo baxayay tan iyo waqtigii la shaaciyay baarlamaanka Maamulka Jubba.
Axmed Madoobe ayaa u mahadceliyay madaxda Dalka oo had iyo jeer maamulka la garab taagan talooyin wax dhisaya, waxaana xulista xubnahani lagu biirinayo Xildhibaannada maamulka Jubba uu xusay in door ay ku yeelan doonto Dowladda Soomaaliya.
Madaxweynaha Jamhuuriyadda Federaalka Soomaaliya mudane Xasan Sheekh Maxamuud oo goor sii horeysay ka qeyb galay munaasabad lagu dhaarinayay Xildhibaanada maamulka Jubba ayaa munaasabadaasi hadal uu ka jeediyay ku sheegay in muhiim ay tahay in maamulka uu xaliyo tabashooyinka ay qabaan beelaha qaar ee saluugsan hanaanka loo maray soo xulista baarlamaanka maamulkaasi, waxaana ku biirista xubnahani cusub ay ka dhigantahay qancinta beelaha ka maqan maamulka Jubba.
