Xildhibaannada Baarlamaanka Federaalka Soomaaliya ayaa kulan ay maanta ku yeesheen magaalada Muqdisho waxaa loogu qeybiyey Mooshinka Kalsooni kala noqoshada Xukumadda Ra’iisul wasaare Cabdiweli, ayadoo dhanka kalena xildhibaannada loo qeybiyey Miisaaniyadda Dowladda ee sanadka 2015 iyo Hindise Sharciyeedka dhismaha Guddiga Xaduudaha iyo Federaaleynta Dalka
Kulanka Baarlamaanka ee maanta waxaa soo xaadiray 208 Xildhibaan, waxaana shir Gud oominayey Guddoomiyaha Golaha Shacabka Mudane Maxamed Sheekh Cusmaan Jawaari. ayadoo Guddoomiye ku-xigeennada Koowaad iyo Labaadna ay goobjoog ahaayeen.
Ajandaha shirka Baarlamaanka ee maanta waxa uu ka koobnaa seddex ajande oo uu ugu horeeyey qeybinta Mooshinka Kalsooni kala noqoshada Ra’isulwasaare C/weli iyo Xukuumaddiisa, kaasi oo maanta Mudaneyaasha Baarlamaanka loo wada qeybiyey waloow ay markii hore Xildhibaannada qaarkood dood ka keeneen habraaca loo marayo mooshinka, balse Guddoonka waxa uu Xildhibaannada ku qanciyey ku dhaqanka xeer hoosaadka Golaha Shacabka gaar ahaan qodobkiisa 75aad,farqadiisa 3aad oo ka hadlaysa mooshinka kalsooni kala noqoshada Xukuumadda.
Afhayeenka Baarlamaanka Mudane Maxamed Sheekh Cusmaan Jawaari oo la hadlay Xildhibaannada Baarlamaanka ayaa xusay in maalinnimada beritto ah ay Baarlamaanka hor imaan doonaan Wasiirrada Maalliyadda iyo Arrimaha Gudaha si ay Xildhibaannada ugu kala akhriyaan miisaaniyadda Dowladda ee sanadka 2015 iyo Hindise Sharciyeedka Xuduudaha iyo Federaaleynta Dalka, ayadoo dhanka kalena uu Guddoomiyaha Baarlamaanku shaaciyey in maalinta Khamiista ah ay Xildhibaannadu guda geli doonaan dooda la xiriirta mooshinka codka Kalsooni kala noqoshada Ra’isulawasaaraha, sabtidana lasoo gebagebeyn doono.
