Xisbiga Dimuqraaddiga ayaa si rasmi ah xalay u caleemo saaray in xog-hayihii hore ee arrimaha dibadda Mareykanka Hillary Clinton ay u noqoto musharaxa madaxtinnimo ee xisbigaasi u matali doona doorashada madaxweyne ee sanadkan ka dhici doonta Mareykanka.
Bernie Sanders oo la tartamayay Hillary Clinton ayaa ka sheegay shirka in uu jeclaan lahaa in nidaamka la marayo marka la magacaabayo musharaxa la joojiyo oo si toos ah Hillary loo magacaabo.
Waxay aheyd taageero lamid ah tii ay Clinton sameysay 8 sano ka hor markii ay mikrafoonka ku soo dhawaatay si ay u ayiddo taageerana ugu muujiso Barack Obama oo tartankii is reereebka kaga soo adkaaday xisibiga dhexdiisa.
Seygeeda Bill Clinton, ayaa sidoo kale madasha ka hadlay, isagoo sheegay sababaha in Hillary bisha November ee soo socota loogu codeeyo inay noqoto madaxweynaha Mareykanka.
Hillary Clinton, ayaa noqotay haweeneydii ugu horeysay ee musharax u noqota mid ka mid ah xisbiyada waaweyn ee taariikhda Mareykanka.
