Muqdisho 22. August.2015——Munaasabad uu xilka kula kala wareegayay Xoghayaha Joogtada ah ee Xafiiska Ra’iisul Wasaaraha ayaa maanta lagu qabtay Xafiiska, waxaana munaasabadda goob-joog ka ahaa Ra’iisul Wasaare ku xigeenka dalka Mudane Cumar Carte iyo dhamaan shaqaalaha Xafiiska.
Xoghayihii Joogtada Mudane Maxamed Cali Nuur oo hadal kooban jeediyay ayaa u mahad-celiyay shaqaalaha Xafiiska, isaga oo ku amaanay sida xil-kasnimada leh ee ay u gutaan waajibaadkooda shaqada xafiiska “Runtii intii aan xilkan hayay waxaa noo qabsoomay howlo badan, waxaana idinka codsanayaa in la sii wado, si wada jir ahna loo wajaho howlaha qaranka” ayuu yiri Mudane Maxamed Cali Nuur.
Xoghayaha Joogtada ee Xafiiska Ra’iisul Wasaare Cabdisalaan Salwe ayaa uga mahadceliyey Shaqaalaha Xafiiska Ra’iisul Wasaaraha soo dhaweynta diiran ee ay u sameeyeen, wuxuuna ballan-qaaday inuu howsha meeshaas kasii wadi doono, kana faa’iideysan doono khibradda baaxadda wayn ee uu Xafiiska ugu yimid.
Ugu dambeyn, waxaa munaasabadda soo xiray Ra’iisul ku-xixeenka Soomaaliya, Mudane Maxamed Cumar Carte oo u mahad celiyay Xoghayihii hore ee Xafiiska Ra’iisul Wasaaraha Mudane Maxamed Cali Nuur, wuxuuna ku tilmaamyay shaqada uu xafiiska ka soo qabtay intii uu xilka hayay ay tusaale wanaagsan u tahay sii socoshada howlaha Xafiiska.
“Walaalkey Maxamed Cali Nuur waxaan leeyahay runtii waxaa shaqada laguu dhiibay waqti adag oo xasaasi ah, waxaadna qabatay shaqo badan oo maanta ka muuqata xafiiska Ra’iisul wasaaraha. Inaguna kumaynaan dhigin meel cidlo ah, waxaan rajeynayaa in khibradiisa laga faaideysan doono. Xog-hayaha cusub waxaan isna leeyahay soo dhawoow xilka aad maanta la wareegtey waa mid culus oo laf-dhabar u ah howlaha Qaranka”.
—DHAMMAAD—
