Wasiirka Gaashaandhigga XFS, Mudane Axmed Macallin Fiqi, oo uu wehelinayay Taliyaha Ciidanka Xoogga Dalka Soomaaliyeed, Sarreeye Guuto Ibraahim Maxamed Maxamuud, ayaa caawa casho-sharaf ku maamuusay Xoghayaha Guud ee Isbahaysiga Dalalka Islaamka ee Ciidamada La-dagaallanka Argagixisada (IMCTC), Sarreeye Gaas Maxamed bin Saciid Al-Moghidi, iyo wafdiga uu hoggaaminayo oo maalmahan booqasho ku joogay magaalada Muqdisho.
Booqashada Xoghayaha Guud iyo wafdigiisa ayaa ujeeddadeedu ahayd ka qeybgalka daahfurka hindisayaasha uu Isbahaysigu ka fulinayo Soomaaliya, kuwaas oo uu ugu horreeyo Hindisaha Istaraatiijiga ah ee “Wariyayaasha Nabadda”, kaas oo lagu xoojinayo doorka warbaahinta ee ka hortagga fikirka xagjirka ah iyo la-dagaallanka argagixisada.
Casho-sharafta waxaa ka qeybgalay Safiirka Soomaaliya u fadhiya Boqortooyada Sacuudi Carabiya, Mudane Maxamed Amiin Sheekh Cusmaan, taliyeyaasha talisyada Ciidanka Xoogga Dalka Soomaaliyeed, Ergayga Soomaaliya u qaabilsan Isbahaysiga, Agaasimaha Guud ee Difaaca Wasaaradda Gaashaandhigga, iyo saraakiil kale.
Jamhuuriyadda Federaalka Soomaaliya iyo Isbahaysiga Dalalka Islaamka ee Ciidamada La-dagaallanka Argagixisada waxaa ka go’an sii xoojinta iskaashiga iyo wada-shaqeynta dhinacyada la-dagaallanka argagixisada, ka hortagga fikirka xagjirka ah iyo fulinta hindisayaasha lagu xaqiijinayo nabadda, amniga iyo xasilloonida Soomaaliya iyo guud ahaan gobolka.
