Xoghayaha Guud ee NATO Jens Stoltenberg, ayaa soo dhaweeyay dib u bilaabashada wada xaajood la yeeshay Turkiga oo ku saabsansidii Dowladaha Sweden iyo Finland, ay ugu biiri lahayeen NATO.
Waxuu carrabka ku adkeeyay in Sweden ay fulisay waajibaadkii iyo Sharuudahii la hordhigay, isaga oo intaa ku daray in la gaaray waqtigii la dhameystiri lahaa hannaanka ansixinta ku biiritaanka Ururka.
Intii lagu guda jiray shir jaraa’id oo ay wada jir u qabteen Ra’iisul wasaaraha Sweden Ulf Christerson iyo Xoghayaha Guud ee NATO Jens Stoltenberg oo booqasho ku jooga Sweden, ayay ku sheegeen in ka mid noqoshada labadan waddan ee NATO ay tahay horumar uu gaaray Ururka.
Xoghayaha Guud ee NATO ayaa sidoo kale tilmaamay in Madaxweynaha Turkiga Recep Tayyip Erdogan ay isku raaceen in dib loo bilaabo kulamadii saddex geesoodka ahaa ee lala yeelanayay Sweden iyo Finland.
Sweden iyo Finland, ayaa codsaday ku biiraan NATO wixii ka dambeeyay dagaalkii uu Ruushku ku qaaday Ukraine, balse arrinkaasi waxaa diidma ka muujiyayTurkiga.
Juun 28, 2022, Turkiga, Sweden iyo Finland, ayaa wada saxiixeen heshiis is afgarad oo saddex geesood ah oo ku saabsan ku biirista labada waddan ee ugu dambeeya NATO, ka dib markii ay ballan qaadeen inay ka jawaabayaan dalabaadka Ankara ee la xiriira iskaashiga macluumaadka iyo la dagaallanka argagixisada.
