Diyaaraddii Air India ee ku burburtay 12-kii June 2025 magaalada Ahmedabad ee dalka Hindiya, ayaa noqday mid si weyn u gilgilay warbaahinta caalamka, kadib markii diyaaraddan oo duulimaadkeedu aha 171 una socotay garoonka Gatwick ee London ay si lama filaan ah u burburtay wax ka yar hal daqiiqo kadib markay kacday.
Diyaaraddan oo ahayd nooca Boeing 787 Dreamliner, ayaa sidday 230 rakaab ah, 10 shaqaale duulimaad iyo 2 duuliye, iyadoo inta badan dadkii saarnaa ay ku dhinteen shilkaas. Warbixin hordhac ah oo uu Sabtidii soo saaray Xafiiska Baadhista Shilalka Diyaaradaha ee Hindiya (AAIB) ayaa sheegtay in qalabka kontoroolka shidaalka ee diyaaradda (Fuel Control Switches)ay si lama filaan ah uga wareegeen booskii loogu talagalay ee (Run) una wareegay (Cutoff), taasoo keentay in labada matoor ee diyaaradda ay isla markiiba joojiyaan shaqada,xilli diyaaradduna ay hawada ku jirtay.
Labada matoor ayaa istaagay isku mar, taasoo sababtay in diyaaraddu si deg deg ah hoos ugu dhacdo.
Warbixintu ma caddayn sababta qalabkaasi uu uga dhaqaaqay booskoodii, mana eedayn cid gaar ah. Hase yeeshee, codad laga helay duubista xagga gudaha kabadhka duuliyeyaasha(Cockpit Voice Recordings) ayaa muujiyay in mid ka mid ah duuliyeyaasha uu weydiiyay kan kale: “Maxaad u damisay?” isagoo ugu jawaabay duuliyihii kalena, “Anigu ma damin!.”
Wali waxaa socda baadhitaannada iyo xogaha laga uruurinaya burburka diyaaraddan.
