Saraakiishani ka socotay hey’adaha Qaramada midoobay ee gaaray magaalada Gaalkacyo ee xarunta maamulka Galmudug ayaa waxa ay kulamo la qaateen mas’uuliyiinta maamulka Galmudug, iyagoo ka wada hadlay arrimo kale duwan oo la xiriira horumarinta deegaaannada maamulkaasi uu ka taliyo.
kulanka oo ahaa mid saxaafadu ay dibadda ka joogtay ayaa markii uu soo dhamaaday kaddib waxaa warbaahinta uga warbixiyay waxyaabihii ay ka wada hadleen Duqa magaalada Gaalkacyo oo sheegay in ay ka wada hadleen sidii ay ugu qeyb qaadan lahaayeen hey’adahaasi baahiya badan oo jira oo ay ka mid tahay dib u dhiska iyo horumarinta gobolka.
“Waxaan isla garanay in horumarka ay ka shaqeeyaan hey’adaha maadaama laga soo gudbay xiligii quudinta loona gudbay dhinaca horumarinta, waxaana hey’adaha hor dhignay balan qaad horey ay u balan qaadeen in dadka barakacayaasha in guryo ay u dhisayaan taasi oo aanan hirgalin iyadana way balan qaadeen in wax ay ka qabanayaan” ayuu yiri Duqa Degmada Gaalkacyo.
Dhinaca kale Duqa magaalada Gaalkacyo ayaa xariga ka jaray suuq cusub oo laga hirgaliyay magaaladaasi kaasi oo loogu adeegi doono bulshada ku dhaqan halkaasi oo soo dhaweeyay suuqaasi cusub.
