Xuska 57 guurada ciidanka Xoogga Dalka Soomaaliyeed oo ku beegan 12-ka April ayaa maanta ka socoto xarunta Wasaaradda Gaashaandhigga Soomaaliya iyo qaar ka mid ah xarumaha ciidamada Xoogga dalka ay ku leeyihiin gobollada dalka.
Xarunta Wasaaradda Gaashaandhigga waxaa ku sii qul qulaya Madaxda dowladda, diblomaasiyiin, saraakiil ciidan iyo marti sharaf kale oo munaasabadda lagu casuumay, waxaana si aad ah loo adkeeyay amniga waddooyinka magaalada Muqdisho iyo kuwa laga soo galo caasimadda intuba.
Taliyaha ciidamada Xoogga dalka Jeneraal Maxamed Axmed Jimcaale Cirfiid ayaa u hambalyeeyay saraakiisha, saraakiil xigeennada, dableyda, alifleyda iyo xaasaskooda, isagoo u rajeeyay guul iyo baraare inay ku gaaraan sanadkan kiisa kale.
12-kii April sanadkii 1960-kii ayay ahayd markii la aas aasay ciidamada xoogga dalka Soomaaliyeed, waxaana maanta ay ku beegantahay 57-guurada ka soo wareegtay aas aaska ciidanka.
