Guddi loo xil saaray qaban qaabada xuska maalinta Dhirta Soomaaliya ayaa maanta guda-galay qaban-qaabada maalintaas oo ku asteysan 17-ka bisha soo socota ee April, kaasi oo lagu qabtay xafiiska Wasiirka Xanaanada Xoolaha ee magaalada Muqdisho.
Guddiga oo uu Guddoomiye u yahay Wasiir ku-xigeenka Wasaaradda Xanaanada Xoolaha, Dhirta iyo Daaqa, uuna magacaabay Wasiirka Wasaarada Xanaanada Xoolaha, ayaa ka kooban 11 xubnood, oo ka kala socda Xafiisyada Madaxweynaha, Ra’iisul wasaaraha, Wasaaradaha Warfaafinta, Ciyaaraha, Gobolka Banaadir iyo Ururka Haweenka Qaranka waxaana ay maanta ka wada hadlayeeen dar dargalinta howlaha loogu diyaar garoobayo Xuska Maalintaan Qaran.
Guddoomiyaha Guddigaasi ahna Wasiir ku-xigeenka Xanaanada Xoolaha Mudane Cabdinaasir Gaarane Maxamed oo Warbaahinta Qaranka la hadlay ayaa sheegay in kulanka uu ahaa mid lagu kala warqaadanayay sidii loo weyneyn lahaa xuska maalinta dhirta Soomaaliya.
“Munaasabadda waxa ay tahay maalinta dhirta Soomaaliya, oo ah maalin Qaran oo ah dhireyn, waxaana rabnaa in munaasabadda si weyn aan u xusno, si loola dagaallamo dadka xaalufuniya dhirta” ayuu yiri Wasiir ku-xigeenka Wasaaradda Xanaanada Xoolaha oo hadalkiisa ku daray
“Wasaaradda waxa ay xoogga saareysaa sidii loo soo nooleyn lahaa hay’adaha la shaqeeya Wasaaradda ee ku saabsan dhanka xanaanada xoolaha iyo dhirta, kulankii maantana in aan arrimahaasi ka wada shaqeyno ayaan isugu nimid”.
r
Sawir qaade: Farxaan Sulaymaan Daahir
