Munaasabada xuska maalinta caalamiga ah ee Oof-wareenka Adduunka oo la xuso sanad walbo 12 November si bulshada looga wacyigeliyo loona xasuusiyo qataraha oof-wareenka uu u lee yahay carruurta.
Munaasabada oo ka qabsoontay Magaalada Baydhabo ayaa waxaa ka soo qeybgalay qaar ka mid ah shaqaalaha Wasaaradda Caafimaadka, madax ka socotay hay’adaha ka howlgala Magaalada Baydhabo iyo Dhaqaatir iyo shaqaale caafimaad oo ka socday xarumaha caafimaadka ee ku yaal Magaalada Baydhabo.
Ugu horreyn, Agaasimaha waaxda Caafimaadka Guud iyo Xakameynta Cudurada ee Wasaaradda Caafimaadka Dr. Cabdirashiid Cabdiqaadir Bujeeti oo furey munaasabada,ayaa ku dheeraadey muhiimada maalintan ay u leedahay bahda Caafimaadka iyo in la is xasuusiyo cudurka oof-wareenka oo dhibaato ba’an kuhaya Carruurta isla markaana wacyigelin muhiim ah lala wadaago bulshada.
Agaasimaha waaxda Caafimaadka Qoyska iyo Bukaan Socodka Drs Naciimo Axmed Caddow, ayaa ka sheekeysay muhiimada Maalintan ay leedahay bahda Caafimaadka in ay iska wareystaan cudurkaan halista ah ee oo wareenka isla markaana bulshada lala wadaago halista uu lee yahay laguna wacyigeliyo waxayna ka codsatay dhamaan bahda caafimaadka in ay ka shaqeeyaan yarenta halista cudurkaan.
Qaar ka mid ah dhaqaatiirta Caafimaad ee ka soo qeybgashay munaasabada, ayaa ka soo qeybgalayaasha u sharaxay halista cudurkaan, qaababka ugu haboon ee looga hortago, calaamadaha uu leeyahay iyo sida loola tacaalo bukaanada uu soo ridto.
12 November sanad walba waxaa Adduunka looga dabaal degaa Maalintaan Caalamiga ah ee Oofwareenka, iyadoo dhakhaatiirta iyo bahda caafimaadka caalamka munaasabadaha ay ka qeybgalaan ku soo bandhigaan daraasado ay ku sameeyaan cudurkan oo si weyn ugu faafay caalamka, iyadoo munaasabada looga arinsaday sidii loo yareyn lahaa isla markaana loogu wacyigelin lahaa bulshada.
