Munaasabadani oo eheyd mid kooban islamarkaana ay ka qeyb galeen shaqaalaha wasaaradda gaashaandhiga Soomaaliya ayaa waxa lagu taageerayay wasiirka wasaaradda gaashaandhigga Gen Maxamed Sheekh Xasan Xaamud, ku xigeenka wasiirka wasaaradaasi,Cabdalla Xuseen Cali, iyo wasiiru dowlaha wasaaradda gaashaandhiga Maxamed Cali Xagaa oo iyagu xilkaasi ka hayay xukuumaddii hore kuwaa oo mar kale ku soo noqday wasaaradaasi.
Munaasabadda oo ay goob joog ka ahaayeen inta badan shaqaalaha wasaaradda Gaashaandhiga, Agaasimayaasha waaxaha, Agaasimaha guud, iyo wasiiru Dowlaha wasaaradda gaashaandhiga ayaa waxa ay muujiyeen sida ay ugu faraxsan yihiin in mar kale ay soo noqdaan mas’uuliyiintaasi.
Agaasimaha maamulka iyo maaliyadda ee wasaaradda gaashaandhigga Cali Aadan Xasan oo ugu horeyn halkaasi ka hadlay ayaa waxa uu sheegay in ay ku faraxsan yihiin islamarkaana ay soo dhaweynayaan in mar kale ay ku soo noqdaan wasaaradda mas’uuliyiintaasi.
Agaasimaha guud ee wasaaradda gaashaandhigga Xukuumadda Soomaaliya Maxamuud C/raxmaan Cowke oo isna hadalka qaatay ayaa waxa uu sheegay ku soo noqoshada mas’uuliyiintani in ay ka dhigan tahay in ay la yimaadeen mudadii ay joogeen xafiiska shaqo wanaag ayna si wanaagsan ula shaqeynayaan.
Ugu dambeyntii Wasiiru dowlaha Wasaaradda gaashaandhigga ee magacaaban mudane Maxamed Cali Xagaa oo munaasabadda soo xiray ayaa muujiyay sida uu ugu faraxsan yahay soo dhaweynta shaqaalaha u sameeyeen, waxaana uu tilmaamay in ay sii kordhin doonaan shaqada baaxadda leh ay u hayaan dadka iyo dalka.
