Ciidamada booliska ee degmada Dhuusamareeb ayaa howlgallo amni xaqiijin ah ka sameeyay xaafadaha iyo waddooyinka magaaladaasi, kuwaasi oo baarayay gaadiidka iyo dadweynaha degmada ku nool.
Ciidamadu waxa ay baarayeen sidoo kale waddooyinka soo gala iyo kuwa ka baxa magaalada Dhuusamareeb, si loo xoojiyo amniga magaalada.
Taliyaha booliska ee saldhiga degmada Dhuusamareeb Cabdullaahi Guuleed Garaar oo la hadlay Warbaahinta Qaranka ayaa sheegay in howlgalladu ay yihiin kuwa lagu xoojinayo amniga magaalada, loogana hortagayo falalka amni darrada ah.
“Howlgalladu waxa ay yihiin mid lagu xaqijinayo amniga, si looga hortago falalka ay maleegayaan dhagar qabayaasha Al-Shabaab, baaritaannada waxaa sidoo kale qeyb ka ah Hoteellada magaalada ku yaala, si aan ula socono dadka magaalada ku soo kordha, ujeedkuna waxa uu yahay in laga hortago qaraxyo laga soo abaabulay meelo ka baxsan magaalada” ayuu yiri taliyaha.
Taliyaha ayaa ka codsaday shacabka in ay la shaqeeyaan hay’adaha amniga, si loo adkeeyo guud ahaan amniga magaalada iyo kan gobolka.
