Madaxweynaha Maamulka Puntland Dr.Cabdiweli Maxamed Cali Gaas iyo Madaxwayne ku xigeenka maamulkaasi Cabdixakiin Cabdulaahi Xaaji Cumar Camey ayaa maanta ka qeyb-galay aas qabuuraha caasimada maamulka Puntland ee Garoowe loogu sameeyey Allaha unaxariiste Marxuum Xildhibaan Saciid Maxamed Cismaan oo loo yaqiinay Saciid Agandi kana mid ahaa Mudanayaasha Golaha wakiilada Puntland.
Aaska ayaa waxaa sidoo kale ka soo qeyb-galay Guddoomiyaha Baaralamaanka Maamulka Puntland Saciid Xasan Shire, guddoomiye ku xigeennada guddoonka Baaralamaanka Puntland, wasiiro ka tirsan xukuumadda Puntland, xildhibaano, waxgarad iyo qaar kamid ah bulshada qaybaheeda kala duwan ee ku nool Garoowe.
Madaxweynaha Maamulka Puntland Dr.Cabdiweli Maxamed Cali Gaas ayaa xildhibaan Saciid Agandi alle uga baryey in janadiisa fardowsa uu ka waraabiyo samir iyo iimaan uu ka siiyo eheladii, asxaabtiisi iyo guud ahaan umadda Soomaaliyeed.
“Waxaan u tacsiyeyeynayaa guud ahaan umadda reer Puntland gaar ahaana waxaan rabaa inaan tacsi uga diro Baaralamaanka iyo gudoonkooda oo uu xildhibaanku si gaar ah uga tirsanaa” Ayuu yiri Dr Gaas.
”Xildhibaan ka tirsan maamulka puntland ayuu ahaa dhammaanteena waa inaga geeryooday, qoyskii uu ka geeryoodayna waxaan leeyahay samir iyo iimaan buuxa ilaahay ha idinka siiyo, wax kheyr qabana dhammaanteena Allaha inoogu badalo ” Ayuu yiri Madaxweynaha Maamulka Puntland.
Madaxweynaha Puntland Dr.Cabdiweli Maxamed Cali Gaas ayaa Marxuum Xildhibaan Saciid Maxamed Agandi ku tilmaamay inuu ahaa nin dhalinayaro ah oo fir-fircoon kana tirsanaa gudiga joogtada ah ee Baaralamaanka maamulkaasi.
Allaha unaxariisto Marxuum Saciid Maxamed Cismaan ayaa maanta gelinkii hore ku geeryooday Magaalo madaxda Puntland ee Garoowe oo uu mudooyinkii u dambeeyey ku xanuusanaa.
-DHAMMAAD-
